ತಾಜ್ ವೆಸ್ಟ್ ಎಂಡ್ ಹೋಟೆಲ್ ನಲ್ಲಿ ಯಶ್-ರಾಧಿಕಾ ಕಲ್ಯಾಣ

ಬೆಂಗಳೂರು: ತಾಜ್ ವೆಸ್ಟ್ ಎಂಡ್ ಹೋಟೆಲ್ ಹಸಿರುವ ವನದ ನಡುವೆ ಕಮಲ ಹೂಗಳಿಂದ ಅಲಂಕೃತಗೊಂಡ ಮಂಟಪದಲ್ಲಿ ಸ್ಯಾಂಡಲ್ ವುಡ್ ಕ್ವೀನ್ ರಾಧಿಕಾ ಪಂಡಿತ್ ಮತ್ತು ರಾಕಿಂಗ್ ಸ್ಟಾರ್ ಯಶ್ ಕಲ್ಯಾಣ ಆರಂಭವಾಗಿದೆ.

ಪ್ರಕೃತಿ ಸಾಕ್ಷಿಯಾಗಿ ಮದುವೆಯಾಗಬೇಕೆಂಬುದು ರಾಧಿಕಾ ಆಸೆಯಾಗಿತ್ತಂತೆ. ಹಾಗಾಗಿಯೇ ಅದಕ್ಕೆ ತಕ್ಕ ಹಾಗೆ ಸೆಟ್ ನಿರ್ಮಿಸಲಾಗಿದೆ. ಸ್ವಾಗತ ಕಮಾನುಗಳನ್ನು ಬಿಳಿ ಮತ್ತು ಹಸಿರು ಹೂಗಳಿಂದ ಅಲಂಕರಿಸಲಾಗಿದೆ. ಮದುವೆಯ ಬಗ್ಗೆ ಹಲವಾರು ಕನಸು ಕಟ್ಟಿಕೊಂಡಿದ್ದ ರಾಧಿಕಾ ಪಂಡಿತ್ ಆಸೆಯಂತೆ ಸಿನಿಮೀಯ ರೀತಿಯಲ್ಲಿ ಮದುವೆ ಸೆಟ್ ನಿರ್ಮಿಸಿ ತನ್ನ ಮುದ್ದಿನ ಹುಡುಗಿಗೆ ಖುಷಿ ನೀಡಿದ್ದಾರೆ ಯಶ್.

ಗುಲಾಬಿ ಬಣ್ಣದ ಸೀರೆಯಲ್ಲಿ ಮಿಂಚುತ್ತಿದ್ದ ರಾಧಿಕಾ ಗೌರಿ ಪೂಜೆ ನೆರವೇರಿಸಿದರು. 11.30 ರ ನಂತರ ನಡೆಯುವ ಅಭಿಜಿನ್ ಮುಹೂರ್ತದಲ್ಲಿ ಯಶ್ ರಾಧಿಕಾಗೆ ಮಾಂಗಲ್ಯ ಧಾರಣೆ ಮಾಡಲಿದ್ದಾರೆ. ವೆಸ್ಟ್ ಎಂಡ್ ನಲ್ಲಿ ನಡೆಯುವ ಸುಂದರ ಕ್ಷಣಗಳನ್ನು ಛಾಯಾಗ್ರಾಹಕ ಭುವನ್ ಗೌಡ ಸೆರೆ ಹಿಡಿಯುತ್ತಿದ್ದಾರೆ.

ಇಂದು ಕೊಂಕಣಿ ಮತ್ತು ಒಕ್ಕಲಿಗ ಸಂಪ್ರದಾಯದಂತೆ ಮದುವೆ ಕಾರ್ಯಕ್ರಮಗಳು ನಡೆಯಲಿವೆ. ಇಂದು ಕೇವಲ ಕುಟುಂಬದವರು ಮತ್ತು ಯಶ್-ರಾಧಿಕಾ ಆಪ್ತೇಷ್ಟರು ಮಾತ್ರ ಪಾಲ್ಗೊಳ್ಳಲಿದ್ದಾರೆ. ನಾಳೆ ಚಿತ್ರರಂಗದ ಗಣ್ಯರಿಗೆ ಅರಮನೆ ಮೈದಾನದಲ್ಲಿ ರಿಸೆಪ್ಷನ್ ಕಾರ್ಯಕ್ರಮವಿದೆ. ಭಾನುವಾರ ಇದೇ ಮೈದಾನದಲ್ಲಿ ಅಭಿಮಾನಿಗಳಿಗಾಗಿ ಮದುವೆ ಊಟ ಹಾಕಿಸುತ್ತಿದ್ದಾರೆ ಯಶ್.

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ