ದಕ್ಷಿಣ ಭಾರತದಲ್ಲಿ ಸಾಕಷ್ಟು ನಿರೀಕ್ಷೆಗಳನ್ನು ಮೂಡಿಸಿರುವ ಚಿತ್ರ ರಜನಿಕಾಂತ್ ಅವರ ಅಭಿನಯದ ಲಿಂಗಾ. ಈ ಚಿತ್ರದಲ್ಲಿ ರಜನಿಕಾಂತ್ ನಟಿಸಿರುವ ಸಂಗತಿಯೇ ಕ್ರೇಜ್ ಉಂಟು ಮಾಡಿದೆ ಎಂದೇ ಹೇಳಬಹುದಾಗಿದೆ.
ಸಿನಿಮಾ ರಜನಿ ಅವರ ಬರ್ತ್ಡೇ ದಿನದಂದು ಬಿಡುಗಡೆ ಆಗುತ್ತಿದೆ. ಅವರ ಲಿಂಗಾ ಚಿತ್ರ ಬಾಕ್ಸಾಫೀಸನ್ನು ಅಲುಗಾಡಿಸುವುದು ಖಾಯಂ ಎನ್ನುವ ಲೆಕ್ಕಾಚಾರ ಹಾಕಿದ್ದರೆ ಕಾಲಿವುಡ್ ಚಿತ್ರ ಪಂಡಿತರು. ಇದರಲ್ಲಿ ಯಾವುದೇ ರೀತಿಯ ಉತ್ಪ್ರೇಕ್ಷೆ ಇಲ್ಲ. ಆದರೆ ಈಗ ನಾವು ಹೇಳುತ್ತಿರುವ ಸಂಗತಿ ಇದಲ್ಲ. ರಜನಿ ತಾವು ನಟಿಸುವ ಚಿತ್ರಗಳಿಂದಲೂ ಪಡೆಯುವ ಸಂಭಾವನೆ ಅಧಿಕ ಮೊತ್ತದಲ್ಲಿ ಇರುತ್ತದೆ ಎನ್ನುವ ಸಂಗತಿ ಎಲ್ಲರಿಗೂ ಗೊತ್ತೇ ಇದೆ.
ಇದಕ್ಕೆ ಸಂಬಂಧಪಟ್ಟಂತೆ ಲಿಂಗಾ ಚಿತ್ರಕ್ಕೂ ಸಹಿತ ಅವರು ಭಾರಿ ಮೊತ್ತದ ಹಣ ಪಡೆದಿದ್ದಾರೆ ಎನ್ನುವ ಸುದ್ದಿ ಇದೆ. ಆದರೆ ಅವರು ಅದೆಷ್ಟರ ಮಟ್ಟಿಗೆ ಹಣ ಪಡೆದಿರಬಹುದು ಎನ್ನುವ ಬಗ್ಗೆ ಸ್ಪಷ್ಟನೆ ಇರಲಿಲ್ಲ. ಸುದ್ದಿ ಒಂದರ ಪ್ರಕಾರ ರಜನಿಕಾಂತ್ ಅವರು ಈ ಚಿತ್ರದ ನಟನೆಗೆಂದು 65 ಕೋಟಿ ರೂಪಾಯಿಗಳಷ್ಟು ಸಂಭಾವನೆ ಪಡೆದಿದ್ದಾರೆ.
ಆದರೆ ಈ ಬಗ್ಗೆ ರಜನಿ ಕಾಂತ್ ಸ್ಪಷ್ಟನೆ ನೀಡಿದ್ದು ತಾನು ಈ ಚಿತ್ರದ ಅಭಿನಯಕ್ಕೆ ಪಡೆದ ಮೊತ್ತ 35 ಕೋಟಿಗಳು ಎಂದು ಹೇಳಿದ್ದಾರೆ. ಆದರೆ ಹೊರಗೆ ಮಾತ್ರ 65 ಕೋಟಿ ಶಬ್ದ ಕೇಳಿ ಬರುತ್ತಿದೆ. ಈ ಸುದ್ದಿ ಸತ್ಯವಲ್ಲ, ನಂಬದಿರಿ ಎಂದು ಹೇಳಿದ್ದಲ್ಲದೆ, ತಾನು ಪಡೆದ ಸಂಭಾವನೆ ನಿರ್ಮಾಪಕರಿಗೆ ತೊಂದರೆ ಆಗುವಂತೆ ಇಲ್ಲ ಎಂದು ಸ್ಪಷ್ಟ ಪಡಿಸಿದ್ದಾರೆ.
ಈ ಚಿತ್ರವನ್ನು ನಿರ್ಮಾಪಕ ರಾಕ್ ಲೈನ್ ವೆಂಕಟೇಶ್ ಈರೋಸ್ ವಿತರಣ ಸಂಸ್ಥೆಗೆ 125 ಕೋಟಿಗೆ ಮಾರಾಟ ಮಾಡಿದ್ದಾರೆ. ಕೆ ಎಸ್ ರವಿಕುಮಾರ್ ಅವರ ನಿರ್ದೇಶನದ ಈ ಚಿತ್ರದಲ್ಲಿ ರಜನಿ ಜೊತೆ ಸೋನಾಕ್ಷಿ ಸಿನ್ಹ ಮತ್ತು ಅನುಷ್ಕ ಶೆಟ್ಟಿ ನಟಿಸಿದ್ದಾರೆ.