ಕನ್ನಡ , ತಮಿಳು, ತೆಲುಗು ಹಾಗೂ ಹಿಂದಿ ಭಾಷೆಗಳ ಚಿತ್ರಗಳಲ್ಲಿ ನಟಿಸಿರುವ ಸುದೀಪ್ ಅವರ ಅಭಿನಯದಲ್ಲಿ ಈಗ ಏಕ ಕಾಲಕ್ಕೆ ದ್ವಿಭಾಷ ಚಿತ್ರ ನಿರ್ಮಾಣವಾಗುತ್ತಿದೆ. ಕಾಲಿವುಡ್ ಪ್ರಸಿದ್ಧ ನಿರ್ದೇಶಕ ಕೆ ಎಸ್ ರವಿಕುಮಾರ್ ಅವರ ನಿರ್ದೇಶನದ ಕನ್ನಡ ಚಿತ್ರ ಅದ್ಯಾಕೋ ಆರಂಭವಾಗಲು ತಡ ಆಗುತ್ತಿದೆ. ಕಿಚ್ಚ ಸುದೀಪ್ ಅವರ ನಟನೆಯ ಈ ಚಿತ್ರಕ್ಕೆ ಅದ್ಯಾಕೋ ಮಹೂರ್ತ ಇನ್ನು ಸರಿಯಾಗಿ ಕೂಡಿ ಬಂದಿಲ್ಲ.ಈ ಚಿತ್ರ ಈಗ ಕನ್ನಡ ಮತ್ತು ತಮಿಳು ಭಾಷೆಗಳಲ್ಲಿ ಸಿದ್ಧವಾಗುತ್ತಿದೆ. ಏಕಕಾಲದಲ್ಲಿ ಕನ್ನಡ ಮತ್ತು ತಮಿಳು ಭಾಷೆಗಳಲ್ಲಿ ನಿರ್ಮಾಣವಾಗುತ್ತಿರುವ ಚಿತ್ರದಲ್ಲಿ ಸುದೀಪ್ ಮೊಟ್ಟಮೊದಲ ಬಾರಿಗೆ ನಟಿಸುತ್ತಿದ್ದಾರೆ.ಇನ್ನೂ ಇದಕ್ಕೆ ಶೀರ್ಷಿಕೆ ನೀಡಿಲ್ಲ, ಆದರೆ ಗಾಂಧಿನಗರಿಗರು ಇದನ್ನು ಕೋಟಿಗೊಬ್ಬ 2 ಎಂದು ಹೆಸರು ನೀಡಿದ್ದಾರೆ.ಈ ಚಿತ್ರವೂ ಜುಲೈ 10ನೇ ತಾರೀಖು ತನ್ನ ಕೆಲಸ ಆರಂಭ ಮಾಡುತ್ತದೆ ಎಂದು ಕೇಳಿ ಬಂದಿತ್ತು. ಆದರೆ ಈಗ ಅದು ಈಗ 17 ನೇ ತಾರೀಖಿಗೆ ಮುಂದೂಡಿದೆ.
ಮೊದಲ ಶೆಡ್ಯೂಲ್ ಬಹುಶಃ 40 ದಿನಗಳು ಇರಬಹುದು, ಒಟ್ಟು ಚಿತ್ರ 100 ದಿನಗಳ ಕಾಲ ಕಾರ್ಯ ನಿರ್ವಹಿಸುತ್ತದೆ ಎನ್ನುವ ಸುದ್ದಿ ಚಂದನವನದ ಮಂದಿಯಿಂದ ಹೊರ ಬಂದಿದೆ. ಇನ್ನೂ ಈ ಚಿತ್ರಕ್ಕೆ ಹೀರೋಯಿನ್ ಆಯ್ಕೆ ಆಗಿಲ್ಲ. ಮೊದಲ ಶೆಡ್ಯೂಲ್ ನಲ್ಲಿ ಸುದೀಪ್ ಹಾಗೂ ಇನ್ನಿತರ ಕಲಾವಿದರು ಮಾತ್ರ ಭಾಗವಹಿಸುತ್ತಾರಂತೆ.