ಸುದೀಪ್ ಡಾ. ರಾಜ್ ಕಪ್ ಕ್ರಿಕೆಟ್‌ನಲ್ಲಿ ಭಾಗವಹಿಸುತ್ತಾರಾ?

ಕನ್ನಡ ಚಿತ್ರರಂಗದ ಬಹುಮುಖ ಪ್ರತಿಭೆ ಕಿಚ್ಚ ಸುದೀಪ್. ಅವರು ನಟನೆಯ ಜೊತೆಗೆ ಕ್ರೀಡೆಗಳತ್ತಲೂ ತಮ್ಮ ಗಮನ ನೆಟ್ಟಿದ್ದಾರೆ. ಕ್ರಿಕೆಟ್ ಪದ್ಯಗಳಲ್ಲಿ ಆಡಿ ತಮ್ಮ ಪ್ರತಿಭೆ ತೋರಿಸಿರುವ ಕಿಚ್ಚ ಪಂದ್ಯದ ನಾಯಕನಾಗಿ ಗೆಲುವನ್ನು ನೀಡಿದ್ದಾರೆ. ಈಗ ರನ್ನ ಚಿತ್ರ ಹಾಗೂ ತಮಿಳು ಚಿತ್ರದ ನಟನೆಯಲ್ಲಿ ಕಿಚ್ಚ ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ.

ನವೆಂಬರ್21ರಿಂದ 23 ತನಕ  ನಡೆಯುವ  ಡಾ. ರಾಜ್ ಕಪ್‌ನ ನಾಲ್ಕನೇ ಆವೃತ್ತಿಯ ಕ್ರಿಕೆಟ್ ಸರಣಿಯಲ್ಲಿ ಸುದೀಪ್ ಭಾಗವಹಿಸುವಂತೆ ಮನವಿ ಮಾಡಲು 12 ಜನರನ್ನು ಒಳಗೊಂಡ  ನಿರ್ಮಾಪಕರ ತಂಡವೊಂದು ಚೆನ್ನೈಗೆ ತೆರಳಿದೆ ಎನ್ನುವ ಸುದ್ದಿ ಈಗ ಗಾಂಧಿನಗರದಲ್ಲಿ ಜೋರಾಗಿ ಓಡಾಡುತ್ತಿದೆ. ರನ್ನ ಚಲನಚಿತ್ರದ  ಚಿತ್ರೀಕರಣ ಪೂರೈಸಿ  ಸುದೀಪ್,  ಚೆನ್ನೈನಲ್ಲಿ  ತಮಿಳು ಚಿತ್ರ ವಿಜಯ್ 38 ಚಿತ್ರದ ಶೂಟಿಂಗ್ ನಲ್ಲಿ ನಿರತರಾಗಿದ್ದಾರೆ.  

ನೃತ್ಯ ನಿರ್ದೇಶಕ ರಾಜೇಶ್ ಬ್ರಹ್ಮಾವರ್ ಅವರ ಅಧ್ಯಕ್ಷತೆಯ ಕನ್ನಡ ಚಲನಚಿತ್ರ ಕಾರ್ಮಿಕರ ಮತ್ತು ಕಲಾವಿದರ ಒಕ್ಕೂಟ ಈ ಕ್ರಿಕೆಟ್ ಸರಣಿಯ ಆಯೋಜಕರಾಗಿದ್ದಾರೆ.

ಶಿವರಾಜ್ ಕುಮಾರ್, ಪುನೀತ್ ರಾಜಕುಮಾರ್, ಉಪೇಂದ್ರ, ದುನಿಯಾ ವಿಜಯ್ ಮತ್ತು ಶ್ರೀನಗರ ಕಿಟ್ಟಿ ತಮ್ಮ ತಂಡಗಳ ನಾಯಕರು. ಈ ಸರಣಿಯ ಅಂತಿಮ ಪಂದ್ಯ ಡಿಸೆಂಬರ್ 7ರಂದು ಮಲೇಷಿಯಾದಲ್ಲಿ ನಡೆಯಲಿದೆ. ಈಗಾಗಲೇ 7 ತಂಡಗಳು ಅಂತಿಮಗೊಂಡಿದೆ. ಸುದೀಪ್ ಅವರು ತಮ್ಮ ನಿಗದಿತ ಕಾರ್ಯದಿಂದ ಬಿಡುವು ಮಾಡಿಕೊಂಡು ಕ್ರಿಕೆಟ್ ಸರಣಿಯಲ್ಲಿ ಭಾಗವಹಿಸುವಂತೆ ಮನವೊಲಿಸುವ ನಿಟ್ಟಿನಲ್ಲಿ ನಿರ್ಮಾಪಕರ ತಂದ ಚೆನ್ನೈನತ್ತ ಹೊರಟಿದೆ. ಸುದೀಪ್ ನಿರ್ಧಾರ ಏನೆಂಬುದು ಇನ್ನು ಸ್ಪಷ್ಟವಾಗಿಲ್ಲ!