ಎಸ್.ಎಸ್. ರಾಜಮೌಳಿ ನಿರ್ಮಾಣದ ಭಾರಿ ಬಜೆಟ್‌ನ ಬಹುನಿರೀಕ್ಷಿತ ಚಿತ್ರ ಬಾಹುಬಲಿ 2 ಇನ್ನೇನು ತೆರೆಗೆ ಬರಲು ಅಣಿಯಾಗುತ್ತಿದೆ. ಬಹುಶಃ ಏಪ್ರಿಲ್ ವೇಳೆಗೆ ಇಡೀ ಜಗತ್ತಿನಾದ್ಯಂತ ಚಿತ್ರ ತೆರೆಕಾಣುವ ಸಾಧ್ಯತೆಗಳಿವೆ.
ಈ ಚಿತ್ರ ಹಿಂದಿ, ತಮಿಳು ಸೇರಿದಂತೆ ಹಲವು ಭಾಷೆಗಳಿಗೆ ಡಬ್ ಆಗಿ ರಿಲೀಸ್ ಆಗಲಿದ್ದು ಅದರಲ್ಲಿ ಕನ್ನಡವೂ ಸೇರಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಡಬ್ಬಿಂಗ್ ವಾಣಿಜ್ಯ ಮಂಡಳಿಯ ಅಧ್ಯಕ್ಷ ಕೃಷ್ಣೇಗೌಡರ ಪ್ರಕಾರ ಅವರೇ ಬಾಹುಬಲಿ 1 ಚಿತ್ರವನ್ನು ಡಬ್ ಮಾಡಿ ರಿಲೀಸ್ ಮಾಡಲಿದ್ದಾರಂತೆ.
ಇದರ ಜತೆಗೆ ಭಾಗ 2ರನ್ನು ಮೂಲ ನಿರ್ಮಾಪಕರೇ ಡಬ್ ಮಾಡಿ ಬಿಡುಗಡೆ ಮಾಡಿದರೆ ಕನ್ನಡಿಗರೂ ಅದ್ದೂರಿ ಚಿತ್ರವನ್ನು ಕಣ್ತುಂಬಿಕೊಳ್ಳಬಹುದು ಎನ್ನುತ್ತಾರೆ ಕೃಷ್ಣೇಗೌಡ. ಈ ಹಿನ್ನೆಲೆಯಲ್ಲಿ ಬಾಹುಬಲಿ 2 ಚಿತ್ರ ಕನ್ನಡಕ್ಕೆ ಬರಲಿದೆಯೇ ಎಂಬುದು ಕುತೂಹಲ ಮೂಡಿಸಿದೆ.
ಡಬ್ಬಿಂಗ್ ಚಿತ್ರಗಳಿಗೆ ಸ್ಯಾಂಡಲ್‌ವುಡ್ ನಿಷೇಧ ಹೇರಿದ್ದರೂ ಆಗಾಗ ಡಬ್ಬಿಂಗ್ ವಿವಾದ ಸದ್ದು ಮಾಡುವುದು ಗೊತ್ತೇ ಇದೆ. ಈ ಬಾರಿ ಬಾಹುಬಲಿ ರೂಪದಲ್ಲಿ ಅದು ಸಾಧ್ಯವಾದರೂ ಆಗಬಹುದು. ಕನ್ನಡ ಚಳವಳಿ ವಾಟಾಳ್ ಪಕ್ಷದ ಅಧ್ಯಕ್ಷ ವಾಟಾಳ್ ನಾಗಾರಾಜ್ ಸೇರಿದಂತೆ ಹಲವು ಕನ್ನಡಪರ ಸಂಘಟನೆಗಳು ಡಬ್ಬಿಂಗ್ ವಿರುದ್ಧ ಗುಡುತ್ತಿರುವುದು ಗೊತ್ತೇ ಇದೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ.