ಪ್ರೇಕ್ಷಕರಿಂದ ಅದ್ಭುತ ಪ್ರತಿಕ್ರಿಯೆ ಸಿಕ್ಕಿದೆ. ನಮ್ಮ ಸಿನಿಮಾ ಸೂಪರ್ ಹಿಟ್ ಆಗಿದೆ. ಹಾಗಾಗಿ ಭಾಗ-2 ಮಾಡುತ್ತಿದ್ದೇವೆ ಎಂದು ಹೇಳುವವರಿಗೇನೂ ನಮ್ಮಲ್ಲಿ ಕೊರತೆಯಿಲ್ಲ. ಆದರೆ ಅವುಗಳಲ್ಲಿ ಯಶಸ್ವಿಯಾಗಿ ಎರಡನೇ ಭಾಗ ಪೂರ್ತಿಗೊಳಿಸುವವರು ತೀರಾ ಅಪರೂಪ. ಇತ್ತೀಚೆಗಂತೂ ಎರಡನೇ ಭಾಗ ಮಾಡಿದ ಉದಾಹರಣೆಯೇ ಕಾಣಸಿಗುತ್ತಿಲ್ಲ.
ಆದರೆ ಆ ಸಾಲಿಗೆ 'ಬಚ್ಚನ್-2' ಸೇರುವ ಸಾಧ್ಯತೆ ಕಡಿಮೆ. ಅಷ್ಟಕ್ಕೂ ಶಶಾಂಕ್ ತಕ್ಷಣ ಮುಂದುವರಿದ ಭಾಗ ಮಾಡುತ್ತಿದ್ದೇವೆ ಎಂದು ಹೇಳುತ್ತಿಲ್ಲ. 2015ರ ಹೊತ್ತಿಗಷ್ಟೇ ಮುಂದುವರಿದ ಭಾಗ ಮಾಡುತ್ತೇವೆ ಎಂದು ಹೇಳಿದ್ದಾರೆ. ಇದಕ್ಕೆ ಕಿಚ್ಚ ಸುದೀಪ್ ಕೂಡ ಸಹಮತ ವ್ಯಕ್ತಪಡಿಸಿದ್ದಾರಂತೆ.
ಚಿತ್ರದ ಹೆಸರು 'ಬಚ್ಚನ್-2' ಎಂದಿದ್ದರೆ, ಟ್ಯಾಗ್‌ಲೈನ್ 'ಆಂಗ್ರಿ ಯಂಗ್ ಮ್ಯಾನ್ ರಿಟರ್ನ್ಸ್' ಎಂದಾಗಿರುತ್ತದೆ. ಇದರಲ್ಲಿ ಮೊದಲ ಭಾಗದ ಕಥೆ ಮುಂದುವರಿಯುವುದಿಲ್ಲ. ನಾಯಕ ಪಾತ್ರ ಹೊರತುಪಡಿಸಿ ಪೂರ್ತಿ ತಾರಾಗಣ, ಕಥೆ ಹೊಸತು ಎಂದು ನಿರ್ದೇಶಕ ಶಶಾಂಕ್ ವಿವರಣೆ ನೀಡಿದ್ದಾರೆ.
ಸದ್ಯ ಕಿಚ್ಚ ಸುದೀಪ್ ಯೋಗರಾಜ್ ಭಟ್‌ರ ಹೊಸ ಚಿತ್ರದಲ್ಲಿ ನಟಿಸಲಿದ್ದಾರೆ. ಅದಾದ ನಂತರ ಇನ್ನೊಂದು ಚಿತ್ರವಿದೆ. ಇನ್ನೊಂದು ವರ್ಷ ಸುದೀಪ್ ಬ್ಯುಸಿಯಾಗಿರುತ್ತಾರೆ. 2014ರಲ್ಲಿ ಸ್ವತಃ ಅವರೇ ನಿರ್ದೇಶನದತ್ತ ಮರಳುವ ಯೋಚನೆ ಮಾಡುತ್ತಿದ್ದಾರೆ. ನಂತರವಷ್ಟೇ ನಮ್ಮ ಚಿತ್ರ ಶುರುವಾಗಲಿದೆ. ಆ ಹೊತ್ತಿಗೆ ನಾನು ಬೇರೊಂದು ಚಿತ್ರ ಮುಗಿಸುತ್ತೇನೆ ಎಂದು ಹೇಳಿದ್ದಾರೆ.
ಅಂದ ಹಾಗೆ, ಕನ್ನಡದಲ್ಲಿ ಮೊದಲ ವಾರದಲ್ಲೇ 8 ಕೋಟಿ ಗಳಿಸುವ ಮೂಲಕ ಸೂಪರ್ ಹಿಟ್ ಹಾದಿಯಲ್ಲಿರುವ 'ಬಚ್ಚನ್' ಈಗ 25 ದಿನಗಳನ್ನು ಪೂರೈಸಿದೆ. ಆರಂಭದಲ್ಲಿ ಹೇಳಿದಂತೆ ಹಿಂದಿ, ತಮಿಳು, ತೆಲುಗು ಸೇರಿದಂತೆ ಪರಭಾಷೆಗಳಿಗೆ ಚಿತ್ರವನ್ನು ಡಬ್ಬಿಂಗ್ ಮಾಡುವ ಯೋಚನೆ ಕೈ ಬಿಡಲಾಗಿದೆ. ಕಾರಣ, ರಿಮೇಕ್ ಹಕ್ಕುಗಳಿಗೆ ಹೆಚ್ಚುತ್ತಿರುವ ಬೇಡಿಕೆ. ಈ ಸಂಬಂಧ ಶೀಘ್ರದಲ್ಲೇ ನಿರ್ಮಾಪಕ ಉದಯ್ ಮೆಹ್ತಾ ಅಧಿಕೃತ ಮಾಹಿತಿ ನೀಡಲಿದ್ದಾರಂತೆ.
ಈ ಹಿಂದೆ ಉಪೇಂದ್ರ, ದಂಡುಪಾಳ್ಯ, ಪರಾರಿ, ಮೈನಾ, ಆ ದಿನಗಳು, ಕೋಟಿಗೊಬ್ಬ ಮುಂತಾದ ಚಿತ್ರಗಳ ಮುಂದುವರಿದ ಭಾಗ ಬರುತ್ತದೆ ಎಂದು ಸುದ್ದಿಯಾಗಿತ್ತು. ಆದರೆ ಇದುವರೆಗೆ ಯಾವುದೂ ನಿಜವಾಗಿಲ್ಲ. ನಿಜವಾಗಿರುವ ಸಾಲಿನಲ್ಲಿರುವ ಇತ್ತೀಚಿನ ಚಿತ್ರಗಳು ಜೋಗಿ ಮತ್ತು ಆಪ್ತಮಿತ್ರ ಮಾತ್ರ. ಈ ಎರಡೂ ಚಿತ್ರಗಳ ಮುಂದುವರಿದ ಭಾಗ ಜೋಗಯ್ಯ ಮತ್ತು ಆಪ್ತರಕ್ಷಕ ಹೆಸರಿನಲ್ಲಿ ಬಂದಿದ್ದವು.