ಮೇ 1ರಿಂದ ನಿತ್ಯ ಪೆಟ್ರೋಲ್, ಡೀಸೆಲ್ ಬೆಲೆ ಪರಿಷ್ಕರಣೆ

ತಿಂಗಳಿಗೆ ಒಂದೆರಡು ಬಾರಿ ಪೆಟ್ರೋಲ್, ಡೀಸೆಲ್ ಬೆಲೆ ಏರಿಳಿತದ ಸುದ್ದಿ ಕೇಳುತ್ತಿದ್ದ ಗ್ರಾಹಕರು ಇನ್ಮುಂದೆ ನಿತ್ಯ ಏರಿಳಿತವನ್ನ ಅನುಭವಿಸಬೇಕಾಗುತ್ತದೆ. ತೈಲ ಕಂಪನಿಗಳು ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಾಗುವ ತೈಲ ದರದ ಏರಿಳಿತಕ್ಕೆ ಅನುಗುಣವಾಗಿ ನಿತ್ಯ ತೈಲ ದರ ಪರಿಷ್ಕರಣೆಗೆ ನಿರ್ಧರಿಸಿವೆ. ಆರಂಭಿಕವಾಗಿ ಮೇ1ರಿಂದ  5 ಪ್ರಮುಖ ನಗರಗಳಲ್ಲಿ ಈ ನಿತ್ಯ ದರ ಪರಿಷ್ಕರಣೆ ಜಾರಿಯಾಗಲಿದ್ದು, ಬಳಿಕ ಇತರೆ ನಗರಗಳಿಗೂ ವಿಸ್ತರಣೆಯಾಗಲಿದೆ.

ತೈಲ ಮಾರುಕಟ್ಟೆಗೆ ಅನುಗುಣವಾಗಿ ಪ್ರತಿದಿನ ದೇಶದ ಎಲ್ಲ ಪೆಟ್ರೋಲ್ ಬಂಕ್`ಗಳಲ್ಲಿ ದರಪರಿಷ್ಕರಣೆ ಮಾಡುತ್ತೇವೆ ಎಂದು ಐಓಸಿ ಮುಖ್ಯಸ್ಥ ಬಿ. ಅಶೋಕ್ ಪಿಟಿಐಗೆ ತಿಳಿಸಿದ್ದಾರೆ. ಪ್ರಾಯೋಗಿಕವಾಗಿ ನಿತ್ಯ ತೈಲ ದರ ಪರಿಷ್ಕರಣೆ ಪುದುಚೇರಿ, ವಿಶಾಖಪಟ್ಟಣ, ರಾಜಸ್ಥಾನದ ಉದಯ್ ಪುರ್, ಜಾರ್ಖಂಡ್`ನ ಜೆಮ್ ಶೆಡ್ ಪುರ್ ಮತ್ತು ಪಂಜಾಬ್`ನ ಚಂಢೀಗಡದಲ್ಲಿ ಆರಂಭಿಸುತ್ತಿದ್ದೇವೆ ಎಂದು ಅವರು ತಿಳಿಸಿದ್ದಾರೆ.

ತಾಂತ್ರಿಕವಾಗಿ ನಿತ್ಯ ದರ ಪರಿಷ್ಕರಣೆ ಸಾಧ್ಯವಿದೆ. ಆದರೆ, ಮೊದಲಿಗೆ ನಾವು ಪ್ರಾಯೋಗಿಕವಾಗಿ ಜಾರಿ ಮಾಡಬೇಕಿದೆ. ಬಳಿಕ ಇತರೆ ನಗರಗಳಿಗೂ ವಿಸ್ತರಣೆಯಾಗಲಿದೆ.ಎಂದಿದ್ದಾರೆ