ಮುಳುಗಿದ ದೋಣಿ: ನೂರಾರು ಜನರು ಸತ್ತಿರುವ ಶಂಕೆ

ಸುಮಾರು 700 ಮಂದಿ ಅಕ್ರಮ ವಲಸಿಗರನ್ನು ಹೊತ್ತ ದೋಣಿಯೊಂದು ಮೆಡಿಟರೇನಿಯನ್ ಸಮುದ್ರದಲ್ಲಿ ಮುಳುಗಿದ್ದು ನೂರಾರು ಜನರು ಅಸುನೀಗಿದ್ದಾರೆಂದು ವರದಿಯಾಗಿದೆ. 

 ಸುಮಾರು 500ರಿಂದ 700 ವಲಸಿಗರನ್ನು ಸಾಗಿಸುತ್ತಿದ್ದ ದೋಣಿ ಮಧ್ಯರಾತ್ರಿ ಸ್ಥಳೀಯ ಕಾಲಮಾನದಲ್ಲಿ ಲಿಬ್ಯಾ ಜಲಪ್ರದೇಶದಲ್ಲಿ ಮುಳುಗಿದೆ. 

 ಈ ವರ್ಷಾರಂಭದಲ್ಲಿ ಮೆಡಿಟರೇನಿಯನ್ ಸಮುದ್ರ ದಾಟುತ್ತಿದ್ದ ಕನಿಷ್ಠ 900 ಅಕ್ರಮ ವಲಸಿಗರು ಸತ್ತಿದ್ದಾರೆ. ಕಳೆದ ವಾರವಷ್ಟೇ ಇಟಲಿಯ ಕರಾವಳಿ ಪಡೆ ಮುಳುಗುತ್ತಿದ್ದ ದೋಣಿಯಿಂದ 10,000 ಜನರನ್ನು ರಕ್ಷಣೆ ಮಾಡಿದ್ದರು. 

 ರಕ್ಷಣಾ ಕಾರ್ಯಾಚರಣೆಯಲ್ಲಿ 20 ಹಡಗುಗಳು ಮತ್ತು 3 ಹೆಲಿಕಾಪ್ಟರು‌ಗಳು ಕಾರ್ಯನಿರತವಾಗಿವೆ.  ಹಾದುಹೋಗುತ್ತಿದ್ದ ಹಡಗೊಂದರ ಗಮನಸೆಳೆಯಲು ವಲಸಿಗರು ದೋಣಿಯ ಒಂದು ಬದಿಗೆ ಬಂದಿದ್ದರಿಂದ ದೋಣಿ ಮುಳುಗಿತೆಂದು ಹೇಳಲಾಗುತ್ತಿದೆ.

ಕಳೆದ ವರ್ಷ ದಾಖಲೆ 1,70,00 ಜನರು ಬಡತನದ ಬೇಗೆಯಿಂದ ಮತ್ತು ಸಂಘರ್ಷದಿಂದ ಆಫ್ರಿಕಾ ಮತ್ತು ಮಧ್ಯಪ್ರಾಚ್ಯದಿಂದ ಇಟಲಿಯನ್ನು ದಾಟಿದ್ದರು. ಸಾವಿರಾರು ಜನರು ಈ ಪ್ರಯಾಣದಲ್ಲಿ ಅಸುನೀಗಿದ್ದರು.