ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಖಾಲೀದಾ ಜಿಯಾ ಪುತ್ರನಿಗೆ ಏಳು ವರ್ಷ ಶಿಕ್ಷೆ

ಹಣ ದುರುಪಯೋಗ ಆರೋಪಗಳು ಸಾಬೀತಾದ ಹಿನ್ನೆಲೆಯಲ್ಲಿ  ಬಾಂಗ್ಲಾದೇಶದ ಮಾಜಿ ಪ್ರಧಾನಿ, ವಿಪಕ್ಷ ನಾಯಕಿ ಖಾಲಿದಾ ಜಿಯಾ ಅವರ ಹಿರಿಯ ಪುತ್ರನಿಗೆ ನ್ಯಾಯಾಲಯ ಏಳು ವರ್ಷಗಳ ಜೈಲು ಶಿಕ್ಷೆ ವಿಧಿಸಿ ಆದೇಶ ಹೊರಡಿಸಿದೆ.

ಸ್ಥಳೀಯ ಕೋರ್ಟ್, ಜಿಯಾ ಅವರ ಹಿರಿಯ ಪುತ್ರ 51 ವರ್ಷ ವಯಸ್ಸಿನ ತಾರೀಕ್ ರೆಹಮಾನ್ ಅವರನ್ನು ನಿರಪರಾಧಿ ಎಂದು ಖುಲಾಸೆಗೊಳಿಸಿದ್ದರೂ ಬಾಂಗ್ಲಾದೇಶದ ಹೈಕೋರ್ಟ್ ಆರೋಪವನ್ನು ಎತ್ತಿಹಿಡಿದು ಏಳು ವರ್ಷಗಳ ಶಿಕ್ಷೆಯನ್ನು ವಿಧಿಸಿ ಆದೇಶ ಹೊರಡಿಸಿದೆ. 

ಲಂಡನ್‌ನಲ್ಲಿ ವಾಸವಾಗಿರುವ ರೆಹಮಾನ್, ಮಾಜಿ ಪ್ರಧಾನಿ ಖಾಲೀದಾ ಜಿಯಾ ಅವರ ಹಿರಿಯ ಪುತ್ರರಾಗಿದ್ದು, ಮುಂದಿನ ಉತ್ತರಾಧಿಕಾರಿ ಎಂದು ಬಿಂಬಿಸಲಾಗಿದೆ. 

ಆರೋಪಿ ತಾರೀಕ್ ರೆಹಮಾನ್ ತಮ್ಮ ರಾಜಕೀಯ ಪ್ರಭಾವ ಬಳಸಿ ತಮ್ಮ ಗೆಳೆಯ ಗಿಸೂದ್ದಿನ್ ಮಾಮುನ್ ಅವರಿಗೆ 2.5 ಮಿಲಿಯನ್ ಡಾಲರ್ ಹಣವನ್ನು ವಿದ್ಯುತ್ ಘಟಕ ಸ್ಥಾಪನೆಗಾಗಿ ನೀಡಲಾಗಿತ್ತು. ನಂತರ ಹಣವನ್ನು ದುರುಪಯೋಗಪಡಿಸಿಕೊಳ್ಳಲಾಯಿತು ಎಂದು ಡೆಪ್ಯೂಟಿ ಅಟಾರ್ನಿ ಜನರಲ್ ಮೊನಿರುಜುಮಾನ್ ಕಬೀರ್ ತಿಳಿಸಿದ್ದಾರೆ.

ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಖಾಲಿದಾ ಜಿಯಾ ಪುತ್ರ ತಾರೀಕ್ ರೆಹಮಾನ್ 45 ಮಿಲಿಯನ್ ಟಾಕಾ ಹಣವನ್ನು ತಮ್ಮ ಖಾತೆಗೆ ವರ್ಗಾಯಿಸಿಕೊಂಡಿದ್ದಾರೆ ಎಂದು ಕೋರ್ಟ್ ತೀರ್ಪಿನಲ್ಲಿ ತಿಳಿಸಿದೆ.

ಆರೋಪಿ ರೆಹಮಾನ್‌ಗೆ ಏಳು ವರ್ಷಜೈಲು ಮತ್ತು 200 ಮಿಲಿಯನ್ ಟಾಕಾ ದಂಡ ಪಾವತಿಸುವಂತೆ ಕೋರ್ಟ್ ತೀರ್ಪಿನಲ್ಲಿ ಆದೇಶಿಸಿದೆ. ಒಂದು ವೇಳೆ, ಸುಪ್ರೀಂಕೋರ್ಟ್‌ ಶಿಕ್ಷೆಯ ಪ್ರಮಾಣವನ್ನು ಕಡಿತಗೊಳಿಸದಿದ್ದರೆ ರೆಹಮಾನ್ ರಾಜಕೀಯ ಜೀವನ ಅಂತ್ಯವಾದಂತಾಗುತ್ತದೆ ಎಂದು ಅಟಾರ್ನಿ ಜನರಲ್ ಕಬೀರ್ ತಿಳಿಸಿದ್ದಾರೆ. 

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.