ಕನ್ಸಾಸ್`ನಲ್ಲಿ ತೆಲಂಗಾಣ ಮೂಲದ ವ್ಯಕ್ತಿಯ ಹತ್ಯೆ ಪ್ರಕರಣ ಹಸಿರಾಗಿರುವಾಗಲೇ ಅಮೆರಿಕದಿಂದ ಮತ್ತೊಂದು ಜನಾಂಗೀಯ ನಿಂದನೆ ಪ್ರಕರಣ ವರದಿಯಾಗಿದೆ. ನ್ಯೂಯಾರ್ಕ್`ನಲ್ಲಿ ವಾಸವಿರುವ 23 ವರ್ಷದ ಏಕ್ತಾ ದೇಸಾಯಿ ಎಂಬ ಮಹಿಳೆ ಮೇಲೆ ಆಫ್ರಿಕನ್-ಅಮೆರಿಕನ್ ವ್ಯಕ್ತಿ ಜನಾಂಗೀಯ ದಾಳಿ ನಡೆಸಿದ್ದಾನೆ. ಗೆಟ್ ಔಟ್ ಆಫ್ ಹಿಯರ್’ ಎಂದು ಭಾರತೀಯ ಮಹಿಳೆ ಮೇಲೆ ಕೂಗಾಡಿ, ಕಿರುಚಾಡಿದ್ದಾನೆ.
ಫೆಬ್ರವರಿ 23ರಂದು ಈ ಘಟನೆ ನಡೆದಿದ್ದು, ಸ್ವತಃ ನಿಂದನೆ ಅನುಭವಿಸಿದ ಏಕ್ತಾ ಈ ವಿಡಿಯೋ ಮಾಡಿದ್ದಾರೆ. ದಿ ವಾಯ್ಸ್ ರೈಸರ್ ವೆಬ್`ಸೈಟ್`ನಲ್ಲಿ ಈ ವಿಡಿಯೋ ಅಪ್ಲೋಡ್ ಆಗಿದ್ದು, ವೈರಲ್ ಆಗಿದೆ.
ವಿಡಿಯೋದಲ್ಲಿ ಅಮೆರಿಕದ ವ್ಯಕ್ತಿ ಜೋರಾಗಿ ಕಿರುಚುತ್ತಿದ್ದು, ಇದು ನಮ್ಮ ಫ್ರೀಡಂ ಆಫ್ ಸ್ಪೀಚ್, ಬ್ಲಾಕ್ ಪವರ್, ಗೆಟ್ ಔಟ್ ಫ್ರಮ್ ಹಿಯರ್ ಎಂದು ಎಗರಾಡಿದ್ದಾನೆ.ವಿಡಿಯೋ ರೆಕಾರ್ಡ್ ಮಾಡುತ್ತಿದ್ದನ್ನ ಗಮನಿಸಿದ ಆತ ಮತ್ತಷ್ಟು ವ್ಯಗ್ರನಾಗಿದ್ದಾನೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಏಕ್ತಾ, 100 ಪ್ರಯಾಣಿಕರಿದ್ದ ರೈಲಿನಲ್ಲಿ ಆತನೂ ನಮ್ಮ ಜೊತೆಗಿದ್ದ. ನಾನು ಎಂದಿನಂತೆ ಕಿವಿಗೆ ಹೆಡ್ ಫೋನ್ ಹಾಕಿಕೊಂಡು ಕುಳಿತಿದ್ದೆ. ಆತ ನನ್ನನ್ನ ನೋಡಿ ಕಿರುಚಾಡುತ್ತಿದ್ದದ್ದು ಗಮನಕ್ಕೆ ಬಂದಿತ್ತು. ಆದರೂ ನಾನು ತಲೆಕೆಡಿಸಿಕೊಳ್ಲಲಿಲ್ಲ ಎಂದು ಹೇಳಿದ್ದಾರೆ.