ಜೋರ್ಡಾನ್‌ನ ರಾಜ ಎರಡನೇ ಅಬ್ದುಲ್ಲಾ ಗುರುವಾರ ವಾಯುದಳದ ಮಾಜಿ ಅಧಿಕಾರಿಯೊಬ್ಬರಿಗೆ ಪ್ರಧಾನಮಂತ್ರಿ ಪಟ್ಟ ನೀಡಿ ದೇಶದ ಹೊಸ ಸಂಪುಟ ರಚಿಸುವಂತೆ ಆದೇಶಿಸಿದ್ದಾರೆ. ಸಂಸತ್ ಚುನಾವಣೆ ಬಳಿಕ ನಿರ್ಗಮಿತ ಪ್ರಧಾನಮಂತ್ರಿ ಮರೌಫ್ ಅಲ್-ಭಕಿತ್ ರಾಜೀನಾಮೆ ನೀಡಿದ ಕೆಲವೇ ಗಂಟೆಗಳಲ್ಲಿ ಅಬ್ದುಲಾ ಮೇಲಿನ ಆದೇಶ ನೀಡಿದ್ದಾರೆ.
ಕೆಂಪು ಸಮುದ್ರದ ವಿಹಾರಧಾಮ ನಗರದಲ್ಲಿ ವಿಶೇಷ ಆರ್ಥಿಕ ವಲಯದ ನೇತೃತ್ವ ವಹಿಸಿದ್ದ 61 ವರ್ಷ ವಯಸ್ಸಿನ ನಡೆರ್ ಅಲ್-ದಹಾಬಿ ರಾಷ್ಟ್ರದ ಪ್ರಧಾನಮಂತ್ರಿಯಾಗಿ ಆಯ್ಕೆಯಾಗಿದ್ದಾರೆ.
ಉದಾರವಾದಿ ರಾಜಕಾರಣಿಯಾಗಿರುವ ಅಲ್ ದಹಾಬಿ ಅಬ್ದುಲ್ಲಾ ಅವರ ಸುಧಾರಣಾ ಕಾರ್ಯಕ್ರಮವನ್ನು ಅನುಷ್ಠಾನಕ್ಕೆ ತಂದು, ಅಮೆರಿಕದ ಜತೆ ನಿಕಟ ಬಾಂಧವ್ಯ ಇಟ್ಟುಕೊಳ್ಳುವರೆಂದು ಮತ್ತು ಅರಬ್-ಇಸ್ರೇಲಿ ಸಂಘರ್ಷಕ್ಕೆ ಶಾಂತಿಯುತ ಪರಿಹಾರಕ್ಕೆ ಪ್ರಯತ್ನಿಸಬಹುದೆಂದು ನಿರೀಕ್ಷಿಸಲಾಗಿದೆ.
