ಬೆಂಗಳೂರು: ಮೋದಿ ಬಿಟ್ಟು ನಾನಿಲ್ಲ, ನನ್ನ ಬಿಟ್ಟು ಮೋದಿ ಇಲ್ಲ ಎಂದು ಬೆಂಗಳೂರು ದಕ್ಷಿಣ ಕ್ಷೇತ್ರದ ಲೋಕಸಭಾ ಅಭ್ಯರ್ಥಿ ಅನಂತಕುಮಾರ್ ಹೇಳಿದ್ದಾರೆ. ಇಂದು ಬೆಳಿಗ್ಗೆ 11 ಗಂಟೆಗೆ ನಾಮಪತ್ರ ಸಲ್ಲಿಸುತ್ತೇನೆ. ಸಮೃದ್ಧ ಭಾರತ, ಬೆಂಗಳೂರಿಗಾಗಿ ಮತಯಾಚಿಸುತ್ತೇನೆ. ಈ ಬಾರಿ ಸಿಕ್ಸರ್ ಬಾರಿಸುವ ವಿಶ್ವಾಸವಿದೆ ಎಂದು ಬೆಂಗಳೂರಿನಲ್ಲಿ ಅನಂತಕುಮಾರ್ ಹೇಳಿದರು. ತಮಗೆ ಕಾಂಗ್ರೆಸ್ ಎದುರಾಳಿ ಬಗ್ಗೆ ಯಾವುದೇ ಭಯವಿಲ್ಲ ಎಂದೂ ಅವರು ನುಡಿದರು. ಬೆಂಗಳೂರು ದಕ್ಷಿಣ ಕ್ಷೇತ್ರದಿಂದ ಸತತವಾಗಿ ಜಯಗಳಿಸುತ್ತಿರುವ ಅನಂತಕುಮಾರ್ ಅವರಿಗೆ ಈಗ ಕಾಂಗ್ರೆಸ್ ಅಭ್ಯರ್ಥಿ ನಂದನ್ ನಿಲೇಕಣಿ ತೀವ್ರ ಪೈಪೋಟಿ ಒಡ್ಡುವರೆಂದು ನಿರೀಕ್ಷಿಸಲಾಗಿದೆ.
ನಿಲೇಕಣಿ ಅನಂತಕುಮಾರ್ ಅವರನ್ನು ಲೇವಡಿ ಮಾಡುತ್ತಾ, ಅನಂತಕುಮಾರ್ ಕ್ಷೇತ್ರದಿಂದ ದೂರ ಉಳಿದಿರುವುದೇ ಅವರು ಮಾಡಿದ ಸಾಧನೆ ಎಂದಿದ್ದರು. ಕ್ಷೇತ್ರಕ್ಕೆ ಯಾವುದೇ ಕೆಲಸ ಮಾಡಿರದೇ ಈಗ ಮೋದಿಯನ್ನು ಗೆಲ್ಲಿಸಿ, ಭಾರತವನ್ನು ಉಳಿಸಿ ಎಂದು ಅನಂತಕುಮಾರ್ ಪ್ರಚಾರ ಮಾಡುತ್ತಿದ್ದಾರೆಂದು ವ್ಯಂಗ್ಯವಾಡಿದ್ದರು. ಈ ಹಿನ್ನೆಲೆಯಲ್ಲಿ ಹೇಳಿಕೆ ನೀಡಿದ ಅನಂತಕುಮಾರ್ ಮೋದಿ ಬಿಟ್ಟು ನಾನಿಲ್ಲ, ನನ್ನ ಬಿಟ್ಟು ಮೋದಿ ಇಲ್ಲ ಎಂದು ಹೇಳಿದ್ದಾರೆ.