ಮಧ್ಯರಾತ್ರಿಯಲ್ಲಿ ನೀವೊಬ್ಬರೇ ಕಾರ್ ಚಲಾಯಿಸಿಕೊಂಡು ಹೋಗುತ್ತಿದ್ದಾಗ ದೆವ್ವವೊಂದು ಕಾರ್ ನಿಲ್ಲಿಸಲೆತ್ನಿಸಿದರೆ ನೀವೇನು ಮಾಡುತ್ತೀರಾ? ನಡುರಾತ್ರಿಯಲ್ಲಿ ಕಾರ್ ಚಲಾಯಿಸಿಕೊಂಡು ಹೋಗುತ್ತಿದ್ದ ವ್ಯಕ್ತಿಯೊಬ್ಬನ ಜತೆ ಇದು ನಡೆದಿದೆ. ಅದಕ್ಕೆ ಆತನೇನು ಮಾಡಿದ ಎನ್ನುತ್ತೀರಾ? ಮುಂದೆ ಓದಿ.
ವ್ಯಕ್ತಿಯೊಬ್ಬ ಕಾರ್ ಚಲಾಯಿಸಿಕೊಂಡು ಹೋಗುತ್ತಿದ್ದಾಗ ಉದ್ದನೆಯ ಕಪ್ಪು ಕೂದಲಿನ, ಬಿಳಿ ಬಟ್ಟೆ ಧರಿಸಿದ್ದ ದೆವ್ವವೊಂದು ಕಾರ್ ಮುಂದೆ ಬಂದು ನಿಂತಿದೆ. ಬೆಚ್ಚಿ ಬಿದ್ದ ಆತ ಕಾರನ್ನು ಹಿಂದಕ್ಕೆ ಚಲಾಯಿಸಿದ್ದಾನೆ. ನೋಡಿದರೆ ಅಲ್ಲೂ ಒಂದು ದೆವ್ವ. ಮುಂದೇನು ಮಾಡಬೇಕು ಎನ್ನುವಷ್ಟರಲ್ಲಿ ಅದು ಕಾರ್ ಹಿಡಿದುಕೊಂಡು ಓಡಿ ಬರಲೆತ್ನಿಸಿದೆ. ಈ ಸಮಯದಲ್ಲಿ ಏನು ಮಾಡಬೇಕು ಎಂದು ತೋಚದ ಕಾರು ಡ್ರೈವರ್ ನೇರವಾಗಿ ಮುಂದುಗಡೆ ಇದ್ದ ದೆವ್ವಕ್ಕೆ ಗುದ್ದಿದ್ದಾನೆ. ಪರಿಣಾಮ ದೆವ್ವ ಮನುಷ್ಯ ಧ್ವನಿಯಲ್ಲಿ ಕಿರುಚುತ್ತ ನೆಲಕ್ಕುರುಳಿದೆ. ಆಗ ಇನ್ನೊಂದು ದೆವ್ವ ಕೆಳಕ್ಕೆ ಬಿದ್ದ ದೆವ್ವದ ರಕ್ಷಣೆಗೆ ಧಾವಿಸಿದೆ. ಇದು ನಡೆದಿರುವುವುದು ಸತ್ಯ . ಆದರೆ ದೆವ್ವ ಮಾತ್ರ ನಕಲಿ.
ಈ ಘಟನೆಯ ವಾಸ್ತವ ಏನೆಂದರೆ ಗುಂಪೊಂದು ದೆವ್ವದ ರೀತಿಯಲ್ಲಿ ವೇಷ ತೊಟ್ಟು ರಾತ್ರಿ ಓಡಾಡುತ್ತಿದ್ದವರನ್ನು ಹೆದರಿಸುತ್ತಿತ್ತು. ಈ ಚೆಲ್ಲಾಟವೀಗ ಅಪಘಾತದಲ್ಲಿ ಅಂತ್ಯ ಕಂಡಿದೆ.
ಈ ದೆವ್ವದ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಹರಿದಾಡುತ್ತಿದೆ. ಇದು ನಡೆದಿರುವುದು ಎಲ್ಲಿ ಎಂಬ ಮಾಹಿತಿ ಮಾತ್ರ ಸಿಕ್ಕಿಲ್ಲ.