ಮುಂಬೈ: ನಿನ್ನೆಯಷ್ಟೇ ಇಂಗ್ಲೆಂಡ್ ವಿರುದ್ಧ ನಡೆಯಲಿರುವ ಏಕದಿನ ಮತ್ತು ಟಿ-ಟ್ವೆಂಟಿ ಸರಣಿಗೆ ಭಾರತ ತಂಡವನ್ನು ಆಯ್ಕೆ ಮಾಡಲಾಗಿತ್ತು. ಆದರೆ ಇದರಲ್ಲಿ ಒಂದು ಪ್ರಮುಖ ಹೆಸರು ಕಾಣೆಯಾಗಿತ್ತು. ಅವರೇ ರೋಹಿತ್ ಶರ್ಮಾ. ಅವರ್ಯಾಕೆ ಆಯ್ಕೆಯಾಗಿಲ್ಲ ಎಂಬ ಪ್ರಶ್ನೆಗೆ ಉತ್ತರ ಸಿಕ್ಕಿದೆ.
ಮೊನ್ನೆಯಷ್ಟೇ ನಡೆದ ರಣಜಿ ಟ್ರೋಫಿ ಸೆಮಿಫೈನಲ್ ಗೆ ಆಯ್ಕೆಯಾಗಿದ್ದ ರೋಹಿತ್ ಟೀಂ ಇಂಡಿಯಾದಲ್ಲಿಲ್ಲ. ಎಂಎಸ್ ಕೆ ಪ್ರಸಾದ್ ತಂಡ ಘೋಷಿಸುವಾಗ ರೋಹಿತ್ ಹೆಸರು ಎಲ್ಲೂ ಕೇಳಿ ಬರಲಿಲ್ಲ. ಅಭ್ಯಾಸ ಪಂದ್ಯದ ತಂಡದಲ್ಲೂ ಅವರ ಹೆಸರಿರಲಿಲ್ಲ. ಯಾಕೆಂದು ಎಲ್ಲರಿಗೂ ಅಚ್ಚರಿಯಾಗಿತ್ತು.
ಅವರ ಅಭಿಮಾನಿಗಳಂತೂ ಸಾಮಾಜಿಕ ಜಾಲತಾಣದಲ್ಲಿ ಹುಯಿಲೆಬ್ಬಿಸಿದರು. ಏಕದಿನ ಪಂದ್ಯಗಳಲ್ಲಿ ಸ್ಥಿರ ಸದಸ್ಯರಾಗಿರುವ ರೋಹಿತ್ ರನ್ನು ಕೈ ಬಿಟ್ಟಿದ್ದೇಕೆ ಎಂಬ ಪ್ರಶ್ನೆಗೆ ಕೊನೆಗೆ ಸ್ವತಃ ಅವರೇ ಸ್ಪಷ್ಟನೆ ನೀಡಬೇಕಾಗಿ ಬಂತು.
ನಿಮ್ಮ ಕಾಳಜಿಗೆ ಧನ್ಯವಾದಗಳು. ಆದರೆ ನಾನಿನ್ನೂ ನೂರರಷ್ಟು ಫಿಟ್ ಆಗಿಲ್ಲ. ಮುಂದಿನ ಆಸ್ಟ್ರೇಲಿಯಾ ಸರಣಿಗೆ ಚೇತರಿಸಿಕೊಳ್ಳುವ ಗುರಿ ಹೊಂದಿದ್ದೇನೆ ಎಂದು ಟ್ವಿಟರ್ ನಲ್ಲಿ ಮೆಸೇಜ್ ಹಾಕಿದ ಬಳಿಕ ಎಲ್ಲರೂ ತಣ್ಣಗಾದರು.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ