ಧರ್ಮಶಾಲಾ: ಟೀಂ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಇತ್ತೀಚೆಗೆ ಧೋನಿ ಜತೆಗಿನ ಹಳೆಯ ಪಂದ್ಯವೊಂದರ ಗೆಲುವಿನ ಕ್ಷಣಗಳ ಫೋಟೋ ಅಪ್ ಲೋಡ್ ಮಾಡಿದ್ದಕ್ಕೇ ಧೋನಿ ನಿವೃತ್ತಿಯಾಗ್ತಾರೆ ಎಂದು ಕೆಲವರು ಸುದ್ದಿ ಹಬ್ಬಿಸಿ ಬಿಟ್ಟರು.
ಈ ಬಗ್ಗೆ ಈಗ ಸ್ವತಃ ವಿರಾಟ್ ಕೊಹ್ಲಿ ಪ್ರತಿಕ್ರಿಯಿಸಿದ್ದಾರೆ. ಈ ಸುದ್ದಿ ಹೊರಬಿದ್ದ ತಕ್ಷಣ ಕೆಲವರು ಧೋನಿ ನಿವೃತ್ತಿಯಾಗುತ್ತಿರುವುದಕ್ಕೆ ವಿರಾಟ್ ಸುಳಿವು ಕೊಟ್ಟರು ಎಂದು ಅನುಮಾನ ವ್ಯಕ್ತಪಡಿಸಿದ್ದರು. ಈ ಸುದ್ದಿ ಹಬ್ಬುತ್ತಿದ್ದ ಧೋನಿ ಪತ್ನಿ ಸಾಕ್ಷಿ ಇದೆಲ್ಲಾ ಸುಳ್ಳು ಸುದ್ದಿ ಎಂದು ಅಲ್ಲಗಳೆದರು.
ಇದೀಗ ದ.ಆಫ್ರಿಕಾ ಸರಣಿಗೂ ಮೊದಲು ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಕೊಹ್ಲಿ ಈ ಬಗ್ಗೆ ಪ್ರತಿಕ್ರಿಯಿಸಿದ್ದಾರೆ. ‘ನಾನು ಮನೆಯಲ್ಲಿ ಕೂತಿದ್ದಾಗ ಸುಮ್ಮನೇ ಒಂದು ಹಳೆಯ ಫೋಟೋ ಅಪ್ ಲೋಡ್ ಮಾಡಿದೆ ಅಷ್ಟೇ. ಅದುವೇ ಸುದ್ದಿಯಾಗಿಬಿಟ್ಟಿತು. ಹೀಗಾಗಿ ಇದು ನನಗೊಂದು ಪಾಠ ಕಲಿಸಿತು. ನಾನು ಏನು ಆಲೋಚನೆ ಮಾಡುತ್ತೇನೋ ಅದನ್ನೇ ಜಗತ್ತೂ ಯೋಚಿಸಬೇಕೆಂದಿಲ್ಲ ಎಂದು ಅರ್ಥ ಮಾಡಿಕೊಂಡೆ. ಆ ಪಂದ್ಯ ನನಗೆ ವಿಶೇಷವಾಗಿತ್ತು. ಅದನ್ನು ನಾನು ಎಲ್ಲೂ ಹೇಳಿಕೊಂಡಿರಲಿಲ್ಲ. ಅದಕ್ಕೇ ಫೋಟೋ ಹಾಕಿದೆ. ಆದರೆ ಜನ ಅದನ್ನು ಬೇರೇ ರೀತಿಯಲ್ಲಿ ಅರ್ಥೈಸಿದರು’ ಎಂದು ಕೊಹ್ಲಿ ಸ್ಪಷ್ಟಪಡಿಸಿದ್ದಾರೆ.