ಬಹುದಿನಗಳ ಕಳಂಕ ತೊಡೆದು ಹಾಕಿದ ವಿರಾಟ್ ಕೊಹ್ಲಿ

ಲಂಡನ್: ಟೀಂ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಮೂರು ಅರ್ಧಶತಕ ಗಳಿಸುವುದರೊಂದಿಗೆ ತಮ್ಮ ಮೇಲಿದ್ದ ಅಪವಾದವೊಂದನ್ನು ತೊಡೆದು ಹಾಕಿದ್ದಾರೆ.

ಕೊಹ್ಲಿ ಸ್ವದೇಶದಲ್ಲಿ ಮಾತ್ರ ಭರ್ಜರಿ ಬ್ಯಾಟಿಂಗ್ ಮಾಡುತ್ತಾರೆ. ಸಾಧ್ಯವಾದರೆ ಇಂಗ್ಲೆಂಡ್ ಗೆ ಬಂದು ಇಲ್ಲಿನ ವೇಗದ ಪಿಚ್ ಗಳಲ್ಲಿ ರನ್ ಗಳಿಸಲಿ ನೋಡೋಣ ಎಂದು ಕಳೆದ ಬಾರಿ ಇಂಗ್ಲೆಂಡ್ ಭಾರತಕ್ಕೆ ಬಂದಿದ್ದಾಗ ವೇಗಿ ಜೇಮ್ಸ್ ಆಂಡರ್ಸನ್ ಸವಾಲೆಸೆದಿದ್ದರು.

ಆಗ ಅವರ ಈ ಹೇಳಿಕೆಗೆ ಸಾಕಷ್ಟು ಮಿಶ್ರ ಪ್ರತಿಕ್ರಿಯೆ ಬಂದಿತ್ತು. ಯಾಕೆಂದರೆ ಇದಕ್ಕಿಂದ ಮೊದಲು ಇಂಗ್ಲೆಂಡ್ ಪ್ರವಾಸ ಕೈಗೊಂಡಿದ್ದಾಗ ಕೊಹ್ಲಿ ರನ್ ಗಳಿಸಲು ಪರದಾಡುತ್ತಿದ್ದರು. ಆಫ್ ಸ್ಟಂಪ್ ಆಚೆ ಹೋಗುವ ವೇಗದ ಬಾಲ್ ಗೆ ಬ್ಯಾಟ್ ಬೀಸುವಲ್ಲಿ ಎಡವುತ್ತಿದ್ದರು.

ಆದರೆ ನಿನ್ನೆಯ ಆಟ ನೋಡಿದ ಮೇಲೆ ಇನ್ನು ಎದುರಾಳಿಗಳು ಹೀಗೆ ಹೇಳುವ ಮೊದಲು ಕೊಂಚ ಆಲೋಚನೆ ಮಾಡಬೇಕು. ಆ ಪರಿ ಶಾಟ್ ಗಳನ್ನೆಲ್ಲಾ ನಿನ್ನೆಯ ಇನಿಂಗ್ಸ್ ನಲ್ಲಿ ಅವರು ಹೊಡೆದಿದ್ದರು. ಅವರ ಅದ್ಭುತ ಕವರ್ ಡ್ರೈವ್, ಸ್ಟ್ರೇಟ್ ಡ್ರೈವ್ ಮನಸೂರೆಗೊಳ್ಳುವಂತಿತ್ತು. ಅದ್ಭುತ ಫುಟ್ ವರ್ಕ್ ಕೂಡಾ ನಿನ್ನೆಯ ಅವರ ಇನಿಂಗ್ಸ್ ನ ಪ್ಲಸ್ ಪಾಯಿಂಟ್.

ಈ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಇದುವರೆಗೆ ಅವರು ನಾಲ್ಕು ಪಂದ್ಯ ಆಡಿದ್ದು ಅದರಲ್ಲಿ ಮೂರು ಅರ್ಧಶತಕ ಗಳಿಸಿದ್ದಾರೆ. ಲಂಕಾ ವಿರುದ್ಧ ಮಾತ್ರ ಶೂನ್ಯ ಸಂಪಾದಿಸಿದ್ದರು. ಮೂರು ಅರ್ಧಶತಕಗಳ ಪೈಕಿ ಎರಡು ಚೇಸ್ ಮಾಡುವಾಗ ಬಂದಿದ್ದು ಎನ್ನುವುದು ವಿಶೇಷ. ಹಾಗಿದ್ದರೂ, ಇಂಗ್ಲೆಂಡ್ ನ ಕ್ಲಾಸೀ ವೇಗಿಗಳನ್ನು ಅವರು ಇಲ್ಲಿ ಎದುರಿಸುವಾಗ ಎಷ್ಟು ಸುಧಾರಿಸಿದ್ದಾರೆಂದು ನೋಡಲು 2018 ರ ಟೆಸ್ಟ್ ಸರಣಿಯವರೆಗೆ ಕಾಯಲೇಬೇಕು.

http://kannada.fantasycricket.webdunia.com
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ