ಕರಾಚಿ: ತನ್ನ ತಂಡ ತಮ್ಮವರಿಂದಲೇ ಹಿಗ್ಗಾ ಮುಗ್ಗಾ ಟೀಕೆಗೊಳಗಾಗುತ್ತಿದೆ. ಐಸಿಸಿ ಶ್ರೇಯಾಂಕದಲ್ಲಿ ಟಾಪ್ 10 ಒಳಗೇ ಇರಲು ಹೆಣಗಾಡುತ್ತಿದೆ. ಹೀಗಿರುವಾಗ ಪಾಕಿಸ್ತಾನದ ಬ್ಯಾಟ್ಸ್ ಮನ್ ಉಮರ್ ಅಕ್ಮಲ್ ತನ್ನನ್ನು ತಾನು ವಿರಾಟ್ ಕೊಹ್ಲಿಗೆ ಹೋಲಿಸಿಕೊಂಡಿದ್ದಾರೆ!
ಪಾಕಿಸ್ತಾನ ಕ್ರಿಕೆಟ್ ಲೀಗ್ ಪಂದ್ಯದಲ್ಲಿ 42 ಬಾಲ್ ಗಳಲ್ಲಿ 66 ರನ್ ಚಚ್ಚಿದ ಮೇಲೆ ಉಮರ್ ಗೆ ಅದೇನು ತಲೆಗೇರಿತೋ ತನ್ನನ್ನು ತಾನು ವಿರಾಟ್ ಗಿಂತಲೂ ಶ್ರೇಷ್ಠ ಎಂದು ಜಂಬ ಕೊಚ್ಚಿಕೊಂಡಿದ್ದಾರೆ. “ಕೊಹ್ಲಿ ಆರಂಭದಿಂದಲೂ 3 ನೇ ಕ್ರಮಾಂಕದಲ್ಲಿ ಆಡುತ್ತಿದ್ದಾರೆ. ನಾನು 6 ನೇ ಕ್ರಮಾಂಕದಲ್ಲಿ ಆಡುತ್ತಿದ್ದೇನೆ. ನನಗೂ ಕೊಹ್ಲಿ ಕ್ರಮಾಂಕ ನೀಡಿ. ಆಮೇಲೆ ನಮ್ಮಿಬ್ಬರನ್ನು ಹೋಲಿಕೆ ಮಾಡಿ. ನಮ್ಮ ದೇಶದ ಬಾಬರ್ ಅಝಮ್ ಕೂಡಾ ಮೂರನೇ ಕ್ರಮಾಂಕದಲ್ಲಿ ಆಡುತ್ತಾರೆ. ಬಾಬರ್ ಮತ್ತು ಕೊಹ್ಲಿಯನ್ನೂ ಪರಸ್ಪರ ಹೋಲಿಕೆ ಮಾಡಬಹುದು” ಎಂದು ಉಮರ್ ಹೇಳಿಕೆ ನೀಡಿದ್ದಾರೆ.
ಇವರ ಹೇಳಿಕೆ ನೋಡಿದರೆ ನಗಬೇಕೋ, ಕೋಪಗೊಳ್ಳಬೇಕೋ ನೀವೇ ಹೇಳಿ. ಉಮರ್ ಇದುವರೆಗೆ 116 ಏಕದಿನ ಪಂದ್ಯವಾಡಿ ಕೇವಲ 2 ಶತಕ ಗಳಿಸಿದ್ದಾರೆ. ಆದರೆ ಕೊಹ್ಲಿ 179 ಏಕದಿನ ಪಂದ್ಯಗಳಿಂದ 27 ಶತಕ ಗಳಿಸಿದ್ದಾರೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ