ಲಂಡನ್: ಮತ್ತೆ ವೀರೇಂದ್ರ ಸೆಹ್ವಾಗ್ ಮತ್ತು ಬ್ರಿಟಿಷ್ ಪತ್ರಕರ್ತ ಪೀರ್ಸ್ ಮಾರ್ಗನ್ ನಡುವೆ ಟ್ವಿಟರ್ ಯುದ್ಧ ಪ್ರಾರಂಭವಾಗಿದೆ. ನಿನ್ನೆ ಮಹಿಳಾ ವಿಶ್ವಕಪ್ ಫೈನಲ್ ಪಂದ್ಯದ ಹಿನ್ನಲೆಯಲ್ಲಿ ಸೆಹ್ವಾಗ್ ಪೀರ್ಸ್ ಗೆ ಸರಿಯಾಗಿಯೇ ಪಂಚ್ ಕೊಟ್ಟಿದ್ದಾರೆ.
ಫೈನಲ್ ಪಂದ್ಯದಲ್ಲಿ ಭಾರತ ಸೋತ ತಕ್ಷಣ ವೀರೇಂದ್ರ ಸೆಹ್ವಾಗ್ ರನ್ನು ಟ್ವಿಟರ್ ನಲ್ಲಿ ಕೆಣಕಿದ ಪೀರ್ಸ್ ‘ನೀವು ಚೆನ್ನಾಗಿದ್ದೀಯಲ್ವಾ ಗೆಳೆಯಾ ಸೆಹ್ವಾಗ್ ?’ ಎಂದು ತಮಾಷೆ ಮಾಡಿದ್ದಾರೆ. ಇದಕ್ಕೆ ತಕ್ಷಣ ತಕ್ಕ ಉತ್ತರ ಕೊಟ್ಟ ಸೆಹ್ವಾಗ್ ಪೀರ್ಸ್ ಗೆ ಮುಖಭಂಗ ಮಾಡಿದ್ದಾರೆ.
‘ನಾನು ಮತ್ತು ನನ್ನ ದೇಶದ ಕೋಟ್ಯಂತರ ಮಂದಿ ನಮ್ಮ ಮಹಿಳಾ ತಂಡದ ಬಗ್ಗೆ ಸೋಲಿನಲ್ಲಿಯೂ ಹೆಮ್ಮೆ ಪಡುತ್ತೇವೆ. ಅದನ್ನು ನೀವು ಕೂಡಾ ಮಾಡಲಾಗದು. ನಾವು ಚೆನ್ನಾಗಿಯೇ ಹೋರಾಡಿದ್ದೇವೆ. ಮತ್ತು ಇನ್ನಷ್ಟು ಚೆನ್ನಾಗಿ ನಿರ್ವಹಣೆ ತೋರುತ್ತೇವೆ. ಎಂಜಾಯ್’ ಎಂದುತ್ತರಿಸಿದ್ದಾರೆ.
ರಿಯೋ ಒಲಿಂಪಿಕ್ಸ್ ಸಂದರ್ಭದಲ್ಲಿ ಭಾರತೀಯರು ಏಕೈಕ ಬೆಳ್ಳಿ ಗೆದ್ದಿದ್ದಕ್ಕೆ ಇಷ್ಟೊಂದು ಸಂಭ್ರಮಿಸುತ್ತಿದ್ದಾರೆ ಎಂದು ಕುಹುಕವಾಡಿದ್ದ ಪೀರ್ಸ್ ಗೆ ಸೆಹ್ವಾಗ್ ಸರಿಯಾಗಿಯೇ ತಿರುಗೇಟು ನೀಡಿದ್ದರು. ಅಂದಿನಿಂದ ಭಾರತ ಮತ್ತು ಇಂಗ್ಲೆಂಡ್ ನಡುವೆ ಯಾವುದೇ ಪಂದ್ಯ ನಡೆದರೂ ಇವರಿಬ್ಬರ ನಡುವಿನ ಟ್ವಿಟರ್ ಚಕಮಕಿ ಮಜವಾಗಿರುತ್ತದೆ.