ಮುಂಬೈ: ಟೀಂ ಇಂಡಿಯಾ ಮುಖ್ಯ ಕೋಚ್ ಆಗಿ ಆಯ್ಕೆಯಾಗಿರುವ ರವಿಶಾಸ್ತ್ರಿ ವೇತನ ನಿಗದಿ ಮಾಡುವುದಕ್ಕೆಂದೇ ಬಿಸಿಸಿಐ ವಿಶೇಷ ಸಮಿತಿ ರಚಿಸಿತ್ತು. ಇದೀಗ ಆ ಸಮಿತಿ ಮುಖ್ಯ ಕೋಚ್ ನ ವೇತನ ನಿಗದಿಗೊಳಿಸಿದೆಯಂತೆ. ಅದೆಷ್ಟು ಗೊತ್ತೇ?
ಆಂಗ್ಲ ಮಾಧ್ಯಮವೊಂದರ ಪ್ರಕಾರ ರವಿಶಾಸ್ತ್ರಿ ತಮ್ಮ ಹುದ್ದೆಗೆ ವಾರ್ಷಿಕವಾಗಿ ಸುಮಾರು 7 ಕೋಟಿ ರೂ. ವೇತನ ಜೇಬಿಗಿಳಿಸಲಿದ್ದಾರೆ. ಈ ಪ್ರಸ್ತಾಪವನ್ನು ಇದೀಗ ಬಿಸಿಸಿಐಯ ಕಾರ್ಯ ನಿರ್ವಾಹಕ ಅಧ್ಯಕ್ಷ, ಕಾರ್ಯದರ್ಶಿ ಹಾಗೂ ಸಿಇಒ ಅನುಮೋದಿಸಬೇಕಿದೆ.
ಆದರೂ ಅನಿಲ್ ಕುಂಬ್ಳೆ ಇತ್ತೀಚೆಗೆ ಬಿಸಿಸಿಐ ತಜ್ಞರ ಎದುರು ಮುಂದಿಟ್ಟಿದ್ದ ಬೇಡಿಕೆಗಿಂತ ಎರಡು ಕೋಟಿ ರೂ. ಕಡಿಮೆಯೇ. ಹಾಗಿದ್ದರೂ ರವಿಶಾಸ್ತ್ರಿ ತಂಡದ ನಿರ್ದೇಶಕನಾಗಿದ್ದಾಗಲೂ ಹೆಚ್ಚು ಕಡಿಮೆ ಇಷ್ಟೇ ವೇತನ ಪಡೆಯುತ್ತಿದ್ದರು ಎನ್ನಲಾಗಿದೆ. ಇನ್ನು ಸಹಾಯಕ ಸಿಬ್ಬಂದಿಗಳ ವೇತನ 2 ಕೋಟಿ ರೂ. ಆಸುಪಾಸಿನಲ್ಲಿರಲಿದೆ. ಇನ್ನು ಬ್ಯಾಟಿಂಗ್ ಮತ್ತು ಬೌಲಿಂಗ್ ಸಲಹೆಗಾರರಾಗಿ ಆಯ್ಕೆಯಾದ ರಾಹುಲ್ ದ್ರಾವಿಡ್ ಮತ್ತು ಜಹೀರ್ ಖಾನ್ ರ ವೇತನ ನಿಗದಿಯಾಗಿಲ್ಲ.