ಮಧ್ಯಮ ಕ್ರಮಾಂಕದ ಬ್ಯಾಟ್ಸ್‌ಮನ್ ಸುರೇಶ ರೈನಾ ಅವರ ಆಕರ್ಷಕ ಶತಕದ ನೆರವಿನಿಂದ ಭಾರತ ತಂಡ 2ನೇ ಏಕದಿನ ಪಂದ್ಯದಲ್ಲಿ ಅತಿಥೇಯ ಇಂಗ್ಲೆಂಡ್ ವಿರುದ್ಧ ಡಕ್ವರ್ಥ್ ಲೂಯಿಸ್ ನಿಯಮದ ಪ್ರಕಾರ 133 ರನ್‌ಗಳ ಜಯ ದಾಖಲಿಸಿತು.
ಈ ಮೂಲಕ ಭಾರತ ಐದು ಏಕದಿನ ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿ, ಟೆಸ್ಟ್ ಸರಣಿಯ ಸೋಲಿನ ಕಹಿ ಮರೆಯುವ ಪ್ರಯತ್ನದಲ್ಲಿದೆ. ಸೋಫಿಯಾ ಗಾರ್ಡನ್ಸ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಗೆಲ್ಲಲು 47 ಓವರ್ ಲ್ಲಿ 295 ರನ್ ಸೇರಿಸಬೇಕಿದ್ದ ಅತಿಥೇಯ ಇಂಗ್ಲೆಂಡ್, ಉತ್ತಮ ಆರಂಭದ ಹೊರತಾಗಿಯೂ ಭಾರತೀಯ ಬೌಲರ್‌ಗಳ ಪರಿಣಾಮಕಾರಿ ದಾಳಿಗೆ ಸಿಲುಕಿ 38.1 ಓವರ್‌ಗಳಲ್ಲಿ 161 ರನ್‌ಗಳಿಗೆ ಎಲ್ಲ ವಿಕೆಟ್ ಕಳೆದುಕೊಂಡಿತು.
ಇಂಗ್ಲೆಂಡ್ ತಂಡದ ಪರ ಚೊಚ್ಚಲ ಪಂದ್ಯವಾಡಿದ ಅಲೆಕ್ಸ್ ಹೇಲ್ಸ್ ಗಳಿಸಿದ 40 ರನ್ ಗಳಿಸಿ ಕೊಂಚ ಪ್ರತಿರೋಧ ಒಡ್ಡಿದರು. ಅವರನ್ನುಳಿದು ಎರಡಂಕಿ ದಾಟಿದ ಆಟಗಾರರೆಂದರೆ ನಾಯಕ ಕುಕ್(19), ಇಯಾನ್ ಮೋರ್ಗನ್(28), ಬೆನ್(23), ಕ್ರಿಸ್ ವೋಕ್ಸ್(20) ಹಾಗೂ ಜೇಮ್ಸ್(10) ಮಾತ್ರ.
ಉಳಿದವವರಲ್ಲಿ ಯಾರು ಕ್ರಿಸ್‌ನಲ್ಲಿ ಹೆಚ್ಚು ನಿಲ್ಲದೆ ಪೆವಲಿನ್ ಕಡೆ ಮುಖ ಮಾಡಿದರು. ಭಾರತದ ಪರ ರವೀಂದ್ರ ಜಡೇಜಾ 28ಕ್ಕೆ 4 ವಿಕೆಟ್ ಪಡೆದು ಯಶಸ್ವಿ ಬೌಲರ್ ಎನಿಸಿಕೊಂಡರು. ಅದರಂತೆ ಮಹಮ್ಮದ್ ಶಮಿ, ಆರ್. ಅಶ್ವಿನ್ ತಲಾ 2 ಮತ್ತು ಸುರೇಶ ರೈನಾ ಹಾಗೂ ಭುವನೇಶ್ವರ ಕುಮಾರ ತಲಾ 1 ವಿಕೆಟ್ ಪಡೆದು ಭಾರತದ ಜಯಕ್ಕೆ ಕಾರಣರಾದರು.
ಟಾಸ್ ಸೋತರೂ ಮೊದಲು ಬ್ಯಾಟಿಂಗ್ ಅವಕಾಶ ಪಡೆದ ಭಾರತ, ಪ್ರಾರಂಭದಲ್ಲಿ ತುಸು ಹಿನ್ನೆಡೆ ಸಾಧಿಸಿತ್ತಾದರೂ ಮಧ್ಯಮ ಮತ್ತು ನಿರ್ಣಾಯಕ ಹಂತದಲ್ಲಿ ರೈನಾ ಹಾಗೂ ಧೋನಿ ಜತೆಯಾಟದಲ್ಲಿ ಕೇವಲ 16.5 ಓವರ್‌ಗಳಲ್ಲಿ 144 ರನ್‌ಗಳು ಹರಿದು ಬಂದವು. ನಿಗದಿತ 50 ಓವರ್‌ಗಳಲ್ಲಿ ಭಾರತ 6 ವಿಕೆಟ್ ನಷ್ಟಕ್ಕೆ 304 ರನ್ ಗಳಿಸಿ ಆಂಗ್ಲರಿಗೆ ಭಾರಿ ಸವಾಲೊಡ್ಡಿತ್ತು .
