ಇತ್ತೀಚೆಗಷ್ಟೇ ಏಕದಿನ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದ ರಾಹುಲ್ ದ್ರಾವಿಡ್ ಬಣ್ಣದ ಲೋಕಕ್ಕೆ ಎಂಟ್ರಿ ಕೊಡುತ್ತಾರಾ ಎಂಬ ಪ್ರಶ್ನೆ ನಮ್ಮೆಲ್ಲರನ್ನು ಕಾಡಬಹುದು. ಆದರೆ ಇಂತಹದೊಂದು ಪ್ರಶ್ನೆಗೆ ತಮಾಷೆಯಾಗಿಯೇ ಉತ್ತರಿಸಿರುವ ಭಾರತೀಯ ಕ್ರಿಕೆಟ್‌ನ ದಿ ಗ್ರೇಟ್ ವಾಲ್ ತಮಗೆ ಅವಕಾಶ ನೀಡುವವರು ಯಾರು ಎಂದು ಕೇಳಿದ್ದಾರೆ.
ದ್ರಾವಿಡ್ ಉತ್ತಮ ಕ್ರಿಕೆಟಿಗ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ ತಮ್ಮನ್ನು ತಾವೇ ತುಲನೆ ಮಾಡಿರುವ ದ್ರಾವಿಡ್, ತನ್ನಲ್ಲಿ ಉತ್ತಮ ನಟನಾ ಕೌಶಲ್ಯವಿದೆ ಎಂಬ ಭಾವನೆಯಿಲ್ಲ. ಹೀಗಿದ್ದರೂ ನನಗೆ ಯಾರಾದರೂ ಅವಕಾಶ ನೀಡುತ್ತಾರಾ ಎಂದು ಪ್ರಶ್ನಿಸಿದ್ದಾರೆ.
ಅಂದ ಹಾಗೆ ಸಿನೆಮಾ ನೋಡುವುದೆಂದರೆ ದ್ರಾವಿಡ್ ಅವರಿಗೆ ತುಂಬಾನೇ ಇಷ್ಟವಂತೆ. ಅವರು ಕೊನೆಯದಾಗಿ ಫರ್ಹಾನ್ ಅಖ್ತರ್ ಅವರ 'ಜಿಂದಗಿ ನಾ ಮಿಲೇಗಿ ದೋಬಾರಾ' ಚಿತ್ರವನ್ನು ವೀಕ್ಷಿಸಿದ್ದಾರಂತೆ.
ಹಾಗಿದ್ದರೂ ಕ್ರಿಕೆಟೇತರ ಚಟುವಟಿಕೆಗಳನ್ನು ದ್ರಾವಿಡ್ ಇಷ್ಟಪಡುವುದಿಲ್ಲವಂತೆ. ಕ್ರಿಕೆಟ್ ಹಾಗೂ ಆಟ ಸಂಬಂಧಿಸಿದ ಎಲ್ಲ ವಿಷಯಗಳಲ್ಲೂ ಭಾಗವಹಿಸುದನ್ನು ನಾನು ಇಷ್ಟಪಡುತ್ತೇನೆ ಎಂದು 38ರ ಹರೆಯದ ದ್ರಾವಿಡ್ ತಿಳಿಸಿದ್ದಾರೆ.
ಆದರೆ ತಮ್ಮ ಸಹ ಆಟಗಾರರು ಜಾಹೀರಾತುಗಳಲ್ಲಿ ಪಾಲ್ಗೊಳ್ಳುವುದಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯಿಸಿರುವ ದ್ರಾವಿಡ್, ಈ ಬಗ್ಗೆ ಯಾವುದೇ ಅಭ್ಯಂತರವಿಲ್ಲ ಎಂದಿದ್ದಾರೆ. ಇವೆಲ್ಲವೂ ಆಟಗಾರರ ವೈಯಕ್ತಿಕ ಬದುಕಿಗೆ ಸಂಬಂಧಪಟ್ಟ ವಿಚಾರ. ಏಕದಿನ ಹಾಗೂ ಟ್ವೆಂಟಿ-20 ಕ್ರಿಕೆಟ್‌ಗೆ ವಿದಾಯ ಹಾಡಿದ ನಿರ್ಧಾರ ನನ್ನದ್ದಾಗಿತ್ತು. ಯಾಕೆಂದರೆ ಇದರಿಂದ ನನ್ನ ಮಗನ ಜತೆ ಹೆಚ್ಚು ಕಾಲ ಕಳೆಯುವುದನ್ನು ಇಷ್ಟಪಡುತ್ತೇನೆ ಎಂದಿದ್ದಾರೆ.