ಬದ್ಧ ವೈರಿ ಪಾಕಿಸ್ತಾನ ವಿರುದ್ಧ ಸ್ಮರಣೀಯ ಗೆಲುವು ಸಾಧಿಸುವಂತೆ ತಂಡವನ್ನು ಮುನ್ನಡೆಸಿದ ತಂಡದ ನಾಯಕ ಅನಿಲ್ ಕುಂಬ್ಳೆ ಅವರು ಇಂದಿನ ಈ ಸ್ಮರಣೀಯ ಗೆಲುವಿಗೆ ತಂಡದ ಒಟ್ಟಾರೆ ಪ್ರದರ್ಶನ ಕಾರಣ ಎಂದು ಹೇಳಿದ್ದಾರೆ.
ಪರಿಸ್ಥಿತಿಗೆ ಅನುಗುಣವಾಗಿ ಬ್ಯಾಟಿಂಗ್, ಬೌಲಿಂಗ್ ಮತ್ತು ಇತರ ವಿಭಾಗಗಳಲ್ಲಿ ಆಟವನ್ನು ಪ್ರದರ್ಶಿಸಿದ್ದು ಗೆಲುವಿಗೆ ಕಾರಣವಾಯಿತು. ಮೊದಲ ಬಾರಿಗೆ ಟೆಸ್ಟ್ ತಂಡದ ನಾಯಕನಾಗಿ ಗೆಲುವನ್ನೆ ದಕ್ಕಿಸಿಕೊಂಡ ಅಪರೂಪದ ನಾಯಕ ಎಂದು ಕುಂಬ್ಳೆ ಹೆಸರು ಪಡೆಯುವಂತಾಯಿತು.
ನನ್ನ ಮಟ್ಟಿಗೆ ಇದೊಂದು ನೆನಪಿನಲ್ಲಿ ಉಳಿಯಬಹುದಾದಂತಹ ಐತಿಹಾಸಿಕ ಗೆಲುವು. ಫಿರೋಜ್ ಷಾ ಕೋಟ್ಲಾ ಮೈದಾನದೊಂದಿಗೆ ನನ್ನದೇ ಆದ ಅಪರೂಪದ ನೆನಪುಗಳು ಸಾದನೆಗಳು ಮೇಳೈಸಿವೆ. ಬೌಲರುಗಳ ಕುರಿತು ವಿಶೇಷವಾಗಿ ಮಾತನಾಡಿದ ಕುಂಬ್ಳೆ ಎರಡು ಇನ್ನಿಂಗ್ಸ್‌ಗಳಲ್ಲಿ ಪಾಕ್ ತಂಡವನ್ನು 250ರನ್‌ಗಳ ಒಳಗೆ ಕಟ್ಟಿ ಹಾಕಿದ್ದು, ಬ್ಯಾಟ್ಸಮನ್‌ಗಳಿಗೆ ಸೂಕ್ತ ವೇದಿಕೆ ಒದಗಿಸಿತು.
ಬೌಲಿಂಗ್ ನಂತರ ಬ್ಯಾಟಿಂಗ್ ಕೂಡ ಅಷ್ಟೇ ಪರಿಣಾಮಕಾರಿಯಾಗಿ ತನ್ನ ಆಟವನ್ನು ಪ್ರದರ್ಶಿಸಿತು. ಲಕ್ಷ್ಮಣ-ಧೋನಿಯ ನಡುವಿನ ಮೊದಲ ಇನ್ನಿಂಗ್ಸ್ ಜೊತೆಯಾಟ, ಎರಡನೆ ಇನ್ನಿಂಗ್ಸ್‌ನಲ್ಲಿ ಜಾಫರ್-ದ್ರಾವಿಡ್, ಸಚಿನ್ ಸೌರವ್ ನಡುವಿನ ಜೊತೆಯಾಟಗಳು ತಂಡವನ್ನು ಅಕ್ಷರಶಃ ಗೆಲುವಿನ ಅಂಚಿಗೆ ಸರಿಸಿತು.
ಪಂದ್ಯ ಪುರುಷೋತ್ತಮ ಪ್ರಶಸ್ತಿ ಸ್ವೀಕರಿಸಿ ಮಾತನಾಡುತ್ತಿದ್ದ ಅವರು, ಈ ವಯಸ್ಸಿನಲ್ಲಿ, ಅದೂ ಮೂರೇ ತಿಂಗಳ ವಿಶ್ರಾಂತಿಯ ನಂತರ ಪಂದ್ಯವೋಂದರಲ್ಲಿ ಏಳು ವಿಕೆಟ್ ತೆಗೆದದ್ದು ಉತ್ತಮ ಸಂಗತಿ ಎಂದು ಹೇಳಿದರು.