ಆರ್‌ಸಿಬಿಗೆ ಆಡಬೇಡಿ : ಯುವಿಗೆ ಕಿಂಗ್ ಫಿಷರ್ ನೌಕರರ ಯೂನಿಯನ್ ಪತ್ರ
, ಶನಿವಾರ, 15 ಫೆಬ್ರವರಿ 2014 (17:13 IST)
ಬೆಂಗಳೂರು: ಯುವರಾಜ್ ಸಿಂಗ್ ಅವರಿಗೆ ರಾಯಲ್ ಚಾಲೆಂಜರ್ಸ್ ಪರ ಆಡದಂತೆ ಕಿಂಗ್ ಫಿಷರ್ ನೌಕರರ ಸಂಘಟನೆ ಪತ್ರ ಬರೆದಿದೆ. ರಾಯಲ್ ಚಾಲೆಂಜರ್ಸ್ ಫ್ರಾಂಚೈಸಿ ವಿಜಯ್ ಮಲ್ಯಾ ಅವರನ್ನು ಐಪಿಎಲ್ ಹರಾಜಿನಲ್ಲಿ 14 ಕೋಟಿಗೆ ಖರೀದಿಸಿದ್ದಾರೆ. ಕಿಂಗ್ ಫಿಷರ್ ಏರ್‌ಲೈನ್ಸ್ ಮಾಲೀಕರೂ ಕೂಡ ಆಗಿದ್ದ ವಿಜಯ್ ಮಲ್ಯ ಅದರ ನೌಕರರಿಗೆ ಮಾತ್ರ ಕಳೆದ 18 ತಿಂಗಳ ಬಾಕಿ ಸಂಬಳ ಪಾವತಿ ಮಾಡಿಲ್ಲ. ಈ ಹಿನ್ನೆಲೆಯಲ್ಲಿ ನೌಕರರು ಮಲ್ಯ ಆಫರ್ ತಿರಸ್ಕರಿಸುವಂತೆ ಯುವರಾಜ್‌ಗೆ ಮುಕ್ತ ಪತ್ರ ಬರೆದಿದ್ದಾರೆ. ಡಿಯರ್ ಯುವರಾಜ್, ನಾವು ಕಿಂಗ್‌ಫಿಷರ್ ಏರ್‌ಲೈನ್ಸ್ ನೌಕರರು. ನಿಮ್ಮ ಅಭಿಮಾನಿಗಳು. ನೀವು ಶೀಘ್ರದಲ್ಲೇ ಚೇತರಿಸಿಕೊಳ್ಳುವಂತೆ ನಾವು ಮಾತ್ರವಲ್ಲ, ಇಡೀ ರಾಷ್ಟ್ರವೇ ಪ್ರಾರ್ಥಿಸಿತು. ನೀವು ಈಗ ಫಾರಂನಲ್ಲಿದ್ದು ವೃತ್ತಿಜೀವನದಲ್ಲಿ ಪ್ರಗತಿ ಹೊಂದುತ್ತಿರುವುದು ನಮಗೆ ಸಂತೋಷವಾಗಿದೆ.ವಿಜಯ್ ಮಲ್ಯ ನಿಮಗೆ 14 ಕೋಟಿ ರೂ. ಕೊಟ್ಟು ಖರೀದಿಸಿದ್ದಾರೆ. ಆದರೆ ನಮಗೆ ಕಳೆದ 18 ತಿಂಗಳಿಂದ ಸಂಬಳ ಉಳಿಸಿಕೊಂಡಿದ್ದಾರೆ.ನಮ್ಮ ಉಳಿತಾಯವೆಲ್ಲ ಇದರಿಂದ ಖರ್ಚಾಗಿದೆ. ಸಾಲದ ಸುಳಿಗೆ ಸಿಕ್ಕಿಬಿದ್ದಿದ್ದೇವೆ.ಆಸ್ತಿ, ಚಿನ್ನ ಅಡವಿಟ್ಟಿದ್ದೇವೆ. ನಮಗೆ ಸಂಬಳ ನೀಡಲು ಮಲ್ಯ ಬಳಿ ಹಣವಿಲ್ಲ. ಆದರೆ ಐಪಿಎಲ್/ ಫಾರ್ಮುಲಾ 1/ ಕಿಂಗ್‌ಫಿಷರ್ ಕ್ಯಾಲೆಂಡರ್‌ಗಳಿಗೆ ಕೋಟಿಗಟ್ಟಲೆ ಖರ್ಚು ಮಾಡಲು ಹಣ ಇರುತ್ತದೆ.ನೀವು ನಮ್ಮ ಮಾತಿಗೆ ಕಿವಿಗೊಡದೇ ಕ್ರೂರಿ, ಅಮಾನವೀಯ ವ್ಯಕ್ತಿ ಪರ ಕೆಲಸ ಮಾಡಿ ನಕಾರಾತ್ಮಕ ಮನೋಭಾವ ಆಹ್ವಾನಿಸುತ್ತೀರೋ ಅಥವಾ ನೈತಿಕ ಆಧಾರದ ಮೇಲೆ ಉದ್ಯೋಗ ನಿರಾಕರಿಸುತ್ತೀರೋ ನಿರ್ಧರಿಸುವುದು ನಿಮಗೆ ಬಿಟ್ಟಿದ್ದು ಎಂದು ಪತ್ರದಲ್ಲಿ ತಿಳಿಸಿದ್ದಾರೆ.ಯುವರಾಜ್ ಸಿಂಗ್ ಆ ಪತ್ರವನ್ನು ನೋಡಿದ್ದಾರೆಯೇ ಅಥವಾ ಪ್ರತಿಕ್ರಿಯಿಸಿದ್ದಾರೆಯೇ ಎನ್ನುವುದು ತಿಳಿದುಬಂದಿಲ್ಲ.
