ಲಂಡನ್: 2008 ರ ಅಂಡರ್ 19 ವಿಶ್ವಕಪ್ ಕೂಟದಲ್ಲಿ ಭಾರತ ಮತ್ತು ನ್ಯೂಜಿಲೆಂಡ್ ಸೆಮಿಫೈನಲ್ ನಲ್ಲಿ ಪರಸ್ಪರ ಕಾದಾಡಿದ್ದವು. ವಿಶೇಷವೆಂದರೆ ಆಗ ಭಾರತ ತಂಡದ ನಾಯಕರಾಗಿದ್ದವರು ವಿರಾಟ್ ಕೊಹ್ಲಿ, ನ್ಯೂಜಿಲೆಂಡ್ ಗೆ ಕೇನ್ ವಿಲಿಯಮ್ಸನ್ ಅವರೇ ನಾಯಕರಾಗಿದ್ದರು. ಅಂದು ವಿರಾಟ್ ಬಳಗ 3 ವಿಕೆಟ್ ಗಳಿಂದ ರೋಚಕವಾಗಿ ಗೆದ್ದಿತ್ತು.
ಅದಾದ ಬಳಿಕ ಇದೀಗ ಹಿರಿಯರ ವಿಶ್ವಕಪ್ ಕೂಟದ ಸೆಮಿಫೈನಲ್ ನಲ್ಲಿಯೇ ಉಭಯ ನಾಯಕರು ತಮ್ಮ ತಂಡಗಳೊಂದಿಗೆ ಎದುರುಬದುರಾಗುತ್ತಿರುವುದು ವಿಶೇಷ. ನಾಳೆ ಸೆಮಿಫೈನಲ್ ಸಮಯ ನಡೆಯಲಿದೆ.
ಕೇವಲ ಕೊಹ್ಲಿ ಮಾತ್ರವಲ್ಲ, ಅಂದು ಅಂಡರ್ 19 ತಂಡದಲ್ಲಿ ಎದುರು ಬದುರಾಗಿದ್ದ ರವೀಂದ್ರ ಜಡೇಜಾ, ಟಿಮ್ ಸೌಥಿ, ಟ್ರೆಂಟ್ ಬೌಲ್ಟ್ ಇಂದು ಮತ್ತೆ ಎದುರಾಗುತ್ತಿದ್ದಾರೆ. ಹೀಗಾಗಿ ಈ ಪಂದ್ಯದಲ್ಲಿ ಕೀವೀಸ್ ನಾಯಕ ಹಳೆಯ ಸೇಡು ತೀರಿಸಿಕೊಳ್ಳುತ್ತಾರಾ ಅಥವಾ ಟೀಂ ಇಂಡಿಯಾ ತನ್ನ ಅಗ್ರಸ್ಥಾನಕ್ಕೆ ತಕ್ಕ ಆಟವಾಡಿ ಫೈನಲ್ ತಲುಪುತ್ತಾ ಕಾದು ನೋಡಬೇಕಿದೆ.