ಭಾರತ-ವಿಂಡೀಸ್ ಏಕದಿನ: ಹೆಟ್ ಮ್ಯಾರ್, ಶೈ ಹೋಪ್ ಅಬ್ಬರದ ಮುಂದೆ ಪಿಚ್ ಲೆಕ್ಕಕ್ಕೇ ಇಲ್ಲ!

ಚೆನ್ನೈ: ಟೀಂ ಇಂಡಿಯಾ ಆರಂಭಿಕರು ಬ್ಯಾಟಿಂಗ್ ಮಾಡುವಾಗ ಪರದಾಡುವುದನ್ನು ನೋಡಿದಾಗ ದ್ವಿತೀಯ ಇನಿಂಗ್ಸ್ ನಲ್ಲಿ ವೆಸ್ಟ್ ಇಂಡೀಸ್ ಬ್ಯಾಟಿಂಗ್ ಕತೆ ಏನಾಗಬಹುದೋ ಎಂಬ ಆತಂಕ ಕಾಡಿತ್ತು. ಆದರೆ ಶೈ ಹೋಪ್, ಹೆಟ್ ಮ್ಯಾರ್ ಅಬ್ಬರದ ಮುಂದೆ ಪಿಚ್ ಲೆಕ್ಕಕ್ಕೇ ಇರಲಿಲ್ಲ!

ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವಿನ ಮೊದಲ ಏಕದಿನ ಪಂದ್ಯವನ್ನು ವಿಂಡೀಸ್ ಅಧಿಕಾರಯುತವಾಗಿ 8 ವಿಕೆಟ್ ಗಳಿಂದ ಗೆದ್ದುಕೊಂಡಿತು. ಭಾರತ ನೀಡಿದ್ದ 288 ರನ್ ಗಳ ಗುರಿಯನ್ನು ವಿಂಡೀಸ್ 47.5 ಓವರ್ ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 291 ರನ್ ಗಳಿಸಿ ಗುರಿ ಮುಟ್ಟಿತು.

ಟಾಸ್ ಗೆದ್ದು ವಿಂಡೀಸ್ ನಾಯಕ ಮೊದಲು ಫೀಲ್ಡಿಂಗ್ ಆಯ್ದುಕೊಂಡಾಗ ಎಲ್ಲರೂ ಅಚ್ಚರಿಗೊಂಡಿದ್ದರು. ಆದರೆ ಭಾರತದ ಅಗ್ರ ಕ್ರಮಾಂಕದ ಬ್ಯಾಟ್ಸ್ ಮನ್ ಗಳು ರನ್ ಗಳಿಸಲು ಪರದಾಡುವಾಗ ದ್ವಿತೀಯ ಇನಿಂಗ್ಸ್ ನಲ್ಲಿ ಬ್ಯಾಟಿಂಗ್ ಇನ್ನೂ ಕಷ್ಟವಾಗಬಹುದು ಎಂದೇ ಊಹಿಸಿದ್ದರು.

ಆದರೆ ಸುನಿಲ್ ಅಂಬ್ರೋಸ್ ರನ್ನು ಬೇಗನೇ ಕಳೆದುಕೊಂಡ ವಿಂಡೀಸ್ ನಂತರ ತನ್ನ ಗೇರ್ ಬದಲಾಯಿಸಿಕೊಂಡಿತು. ಆರಂಭಿಕ ಶೈ ಹೋಪ್ ಜತೆಗೂಡಿದ ಹೆಟ್ ಮ್ಯಾರ್ 139 ರನ್ ಗಳಿಸಿ ದ್ವಿಶತಕದ ಜತೆಯಾಟವಾಡಿದರು. ಇದರಲ್ಲಿ ಶೈ ಕೊಡುಗೆ 102 ರನ್. ಇವರಿಬ್ಬರ ಅಬ್ಬರದ ಬ್ಯಾಟಿಂಗ್ ಮುಂದೆ ಪಿಚ್ ಕೂಡಾ ಫ್ಲ್ಯಾಟ್ ಆಗಿತ್ತು! ಅಂತಿಮವಾಗಿ ಹೆಟ್ ಮ್ಯಾರ್ ಔಟಾದರೂ ಅಷ್ಟರಲ್ಲಿ ಭಾರತ ಸೋಲಿನ ಸುಳಿಗೆ ಸಿಲುಕಿತ್ತು. ಭಾರತದ ಪರ ಮೊಹಮ್ಮದ್ ಶಮಿ ಮತ್ತು ದೀಪಕ್ ಚಹರ್ ತಲಾ 1 ವಿಕೆಟ್ ಕಬಳಿಸಿದರು.