ಮಿಸ್ಬಾ-ಉಲ್-ಹಕ್ ಲಾರ್ಡ್ಸ್‌ ಮೈದಾನದಲ್ಲಿ 10 ಪುಶ್‌ಅಪ್ ಮಾಡಿದ್ದೇಕೆ?

ಹಿರಿಯ ಬ್ಯಾಟ್ಸ್‌ಮನ್ ಮಿಸ್ಬಾ ಉಲ್ ಹಕ್ ಗುರುವಾರ ಲಾರ್ಡ್ಸ್‌ ಮೈದಾನದಲ್ಲಿ ಅಜೇಯ ಶತಕದೊಂದಿಗೆ ಶ್ರೇಷ್ಟ ಪ್ರದರ್ಶನ ನೀಡಿದ್ದಾರೆ. ಪಾಕಿಸ್ತಾನದ ನಾಯಕ 179 ಎಸೆತಗಳಲ್ಲಿ 110 ರನ್ ಗಳಿಸಿದ್ದು, ಅವರ ಇನ್ನಿಂಗ್ಸ್‌ನಲ್ಲಿ 18 ಬೌಂಡರಿಗಳಿದ್ದವು. ಮೂರಂಕಿಯ ಗಡಿಯನ್ನು ದಾಟಿದ ಕೂಡಲೇ ವಿಶಿಷ್ಠ ರೀತಿಯಲ್ಲಿ ಮಿಸ್ಬಾ ಸಂಭ್ರಮಾಚರಣೆ ಮಾಡಿದರು.

 ಪ್ರೇಕ್ಷಕರ ಕರತಾಡನವನ್ನು ಸ್ವೀಕರಿಸುವ ಮುಂಚೆ, ಮಿಸ್ಬಾ ಸೆಲ್ಯೂಟ್ ಮಾಡಿ ಬಳಿಕ ಹತ್ತು ಪುಷ್‌ಅಪ್‌ಗಳನ್ನು ಮಾಡಿದರು. ಈ ಪ್ರವಾಸಕ್ಕೆ ಮುಂಚೆ ಸಿದ್ದತಾ ಶಿಬಿರದ ಸಂದರ್ಭದಲ್ಲಿ ಪಾಕಿಸ್ತಾನ ತಂಡಕ್ಕೆ ನೆರವಾದ ಪಾಕಿಸ್ತಾನಿ ಸೇನಾಧಿಕಾರಿಗಳಿಗೆ ಗೌರವ ಸಲ್ಲಿಸಲು ತಾವು ಪುಷ್ ಅಪ್ ಮಾಡಿದ್ದಾಗಿ ಅವರು ನಂತರ ಬಹಿರಂಗಮಾಡಿದರು.

 ಗೌರವ ಸಂಹಿತೆಯ ಭಾಗವಾಗಿ ನೆಲದಲ್ಲಿ 10 ಪುಷ್ ಅಪ್‌ಗಳನ್ನು ಮಾಡುತ್ತಿದ್ದೆವು. ನಾನು ಶತಕ ಗಳಿಸಿದರೆ ನಾವು ಅಲ್ಲಿದ್ದೆವು ಎನ್ನುವುದನ್ನು ನೆನಪಿಸಲು ಪುಷ್ ಅಪ್ ಮಾಡುವುದಾಗಿ  ಭರವಸೆ ನೀಡಿದ್ದೆ. ಸೆಲ್ಯೂಟ್ ಮಾಡಿದ್ದು ರಾಷ್ಟ್ರಧ್ವಜಕ್ಕೆ ಎಂದೂಮಿಸ್ಬಾ ಹೇಳಿದರು.  ಮಿಸ್ಬಾ ಮತ್ತು ಅವರ ತಂಡದ ಆಟಗಾರರು ಅಬೋಟಾಬಾದ್ ಸೇನಾ ಬೂಟ್ ಕ್ಯಾಂಪ್‌ನಲ್ಲಿ ಎರಡು ವಾರಗಳ ಕಾಲವಿದ್ದರು. ಯುವ ಆಟಗಾರರು ಅವರಿಗೆ ನಿಯೋಜಿಸಿದ ಕೆಲಸಗಳನ್ನು ಮಾಡಲು ತಿಣುಕಾಡಿದರೆ ಮಿಸ್ಬಾ ಮತ್ತು ಯೂನಿಸ್ ಖಾನ್ ಲೀಲಾಜಾಲವಾಗಿ ಪೂರೈಸಿ ಫಿಟ್ ಆಟಗಾರರೆನಿಸಿದ್ದರು.