ಐಪಿಎಲ್ 2024: ವಿಲ್ ಜ್ಯಾಕ್ಸ್ ಶತಕ ಸಿಡಿಸಿದ್ದಕ್ಕೆ ಮಗುವಿನಂತೆ ಕುಣಿದಾಡಿದ ವಿರಾಟ್ ಕೊಹ್ಲಿ

Photo Courtesy: Twitter

ಬೆಂಗಳೂರು: ಐಪಿಎಲ್ 2024 ರಲ್ಲಿ ಗುಜರಾತ್ ಟೈಟನ್ಸ್ ವಿರುದ್ಧ ನಡೆದ ಪಂದ್ಯವನ್ನು ಆರ್ ಸಿಬಿ ಭರ್ಜರಿಯಾಗಿ 9 ವಿಕೆಟ್ ಗಳಿಂದ ಗೆದ್ದುಕೊಂಡಿದೆ. ಈ ಗೆಲುವಿನ ರನ್ ಜೊತೆಗೆ ಆರ್ ಸಿಬಿ ವಿಲ್ ಜ್ಯಾಕ್ಸ್ ಶತಕವೂ ಪೂರ್ತಿಯಾಗಿತ್ತು.

ಮೊದಲು ಬ್ಯಾಟಿಂಗ್ ಮಾಡಿದ ಗುಜರಾತ್ 20 ಓವರ್ ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 200 ರನ್ ಗಳಿಸಿತು. ಈ ಮೊತ್ತ ಬೆನ್ನತ್ತಿದ ಆರ್ ಸಿಬಿ 16 ಓವರ್ ಗಳಲ್ಲೇ ಕೇವಲ 1 ವಿಕೆಟ್ ನಷ್ಟಕ್ಕೆ 201 ರನ್ ಗಳಿಸಿ ಗೆಲುವು ದಾಖಲಿಸಿತು. ಆರಂಭಿಕ ಫಾ ಡು ಪ್ಲೆಸಿಸ್ 24 ರನ್ ಗಳಿಗೆ ವಿಕೆಟ್ ಒಪ್ಪಿಸಿದ ಮೇಲೆ ವಿರಾಟ್ ಕೊಹ್ಲಿ-ವಿಲ್ ಜ್ಯಾಕ್ಸ್ ಕೊನೆಯವರೆಗೂ ಅಜೇಯರಾಗುಳಿದರು.

ಕೊಹ್ಲಿ 44 ಎಸೆತಗಳಿಂದ 70 ರನ್ ಗಳಿಸಿದರು. ಆದರೆ ಇನ್ನೊಂದೆಡೆ ಅಬ್ಬರಿಸಿದವಿಲ್ ಜ್ಯಾಕ್ಸ್ ಕೇವಲ 41 ಎಸೆತಗಳಿಂದ 10 ಸಿಕ್ಸರ್ ಸಹಿತ 100 ರನ್ ಗಳಿಸಿದರು. ಆರ್ ಸಿಬಿ ಗೆಲುವಿಗೆ 1 ರನ್ ಬೇಕಾಗಿದ್ದಾಗ ವಿಲ್ ಜ್ಯಾಕ್ಸ್ ಶತಕಕ್ಕೆ 6 ರನ್ ಬೇಕಾಗಿತ್ತು. ಯಶಸ್ವಿಯಾಗಿ ಸಿಕ್ಸರ್ ಸಿಡಿಸಿದ ವಿಲ್ ಜ್ಯಾಕ್ಸ್ ಗೆಲುವಿನ ಜೊತೆಗೆ ಶತಕವನ್ನೂ ಪೂರೈಸಿದರು.

ಈ ವೇಳೆ ಕೊಹ್ಲಿ ಸಂಭ್ರಮ ಮುಗಿಲು ಮುಟ್ಟಿತ್ತು. ಅರೆಕ್ಷಣ ಸಿಕ್ಸರ್ ಹೋಗುವುದನ್ನೇ ನಂಬಲಸಾಧ‍್ಯ ರೀತಿಯಲ್ಲಿ ನೋಡುತ್ತಾ ಕುಳಿತಿ ಕೊಹ್ಲಿ ಬಳಿಕ ಚಿಕ್ಕಮಕ್ಕಳಂತೆ ಕುಣಿದಾಡಿಬಿಟ್ಟರು. ವಿಲ್ ಜ್ಯಾಕ್ಸ್ ರನ್ನು ಬಿಗಿದಪ್ಪಿ ಸಂಭ್ರಮಿಸಿದರು. ಈ ದೃಶ್ಯ ನೋಡಿದ ಕೊಹ್ಲಿ ಅಭಿಮಾನಿಗಳು ಈ ಕಾರಣಕ್ಕಾಗಿಯೇ ನಮಗೆ ಕಿಂಗ್ ಕೊಹ್ಲಿ ಎಂದರೆ ಇಷ್ಟ ಎಂದು ಅಭಿಪ್ರಾಯಪಟ್ಟಿದ್ದಾರೆ.