ಕೋಲಾ ದೈತ್ಯ ಕಂಪನಿ ಪೆಪ್ಸಿಕೋ ಐಪಿಎಲ್ ಟೈಟಲ್ ಪ್ರಾಯೋಜಕತ್ವದಿಂದ ಹೊರಬರಲು ಬಯಸಿದ್ದು, ಬಿಸಿಸಿಐಗೆ ನೋಟಿಸ್ ನೀಡಿರುವುದರಿಂದ 2016ರ ಐಪಿಎಲ್ ಪಂದ್ಯಾವಳಿಗೆ ತೀವ್ರ ಪೆಟ್ಟು ಬಿದ್ದಿದೆ. ಸ್ಪಾಟ್ ಫಿಕ್ಸಿಂಗ್ ಪ್ರಕರಣವು ಆಟವನ್ನು ಕುಖ್ಯಾತಿಗೊಳಿಸಿರುವುದರಿಂದ ಈ ನಿರ್ಧಾರವನ್ನು ಪೆಪ್ಸಿಕೊ ಕೈಗೊಂಡಿದೆಯೆಂದು ಹೇಳಲಾಗುತ್ತಿದೆ. ಐಪಿಎಲ್ ಮುಖ್ಯ ನಿರ್ವಹಣಾ ಅಧಿಕಾರಿ ಸುಂದರ ರಾಮನ್ ಅವರಿಗೆ ಪೆಪ್ಸಿಕೊ ಐಪಿಎಲ್‌ನಿಂದ ಹೊರಬರುವ ನಿರ್ಧಾರವನ್ನು ತಿಳಿಸಿದ್ದು, ರಾಮನ್ ಈ ವಿಷಯವನ್ನು ಬಿಸಿಸಿಐ ಅಧ್ಯಕ್ಷ ಶಶಾಂಕ್ ಮನೋಹರ್ ಅವರಿಗೆ ತಿಳಿಸಿದ್ದಾರೆ.
ಪೆಪ್ಸಿಕೋ ಮತ್ತು ಬಿಸಿಸಿಐ ಜಂಟಿ ಹೇಳಿಕೆಯನ್ನು ಬಿಡುಗಡೆ ಮಾಡಿ, ಬಿಸಿಸಿಐ ಮತ್ತು ಪೆಪ್ಸಿಕೋ ದೀರ್ಘಾವಧಿಯ ಸೌಹಾರ್ದ ಸಂಬಂಧವಿದ್ದು, ಪೆಪ್ಸಿಕೋ ಕಳವಳವನ್ನು ನಿವಾರಿಸುವ ಪರಿಹಾರಕ್ಕೆ ಚರ್ಚೆ ನಡೆಸಿವೆ. ಅದು ಸಿದ್ಧವಾದ ಕೂಡ ಎರಡೂ ಕಡೆಯವರು ಅದನ್ನು ಹಂಚಿಕೊಳ್ಳುತ್ತೇವೆ ಎಂದು ತಿಳಿಸಿದೆ.
ಅವರದ್ದೇ ಹಿತಾಸಕ್ತಿ ದೃಷ್ಟಿಯಿಂದ ಅವರು ಸೀಸನ್‌ನಲ್ಲಿ ಒಪ್ಪಂದದಿಂದ ಹೊರಬರಲು ಇಚ್ಛಿಸಿದ್ದಾರೆಯೇ ಹೊರತು ಐಪಿಎಲ್ ಕುಖ್ಯಾತಿಯಿಂದಲ್ಲ ಎಂದು ಬಿಸಿಸಿಐ ಮೂಲವೊಂದು ತಿಳಿಸಿದೆ. ನಮ್ಮ ಬಳಿ ಬ್ಯಾಂಕ್ ಖಾತರಿಯಿದ್ದು ಅದನ್ನು ಮುಟ್ಟುಗೋಲು ಹಾಕಿಕೊಳ್ಳುವ ಅವಕಾಶವಿದ್ದರೂ ನಾವು ಹಾಗೆ ಮಾಡುತ್ತಿಲ್ಲ. ಯಾರಿಗೆ ಹಕ್ಕು ಸಿಗುತ್ತದೋ ಅದನ್ನು ಪೆಪ್ಸಿಯಿಂದ ವರ್ಗಾವಣೆ ಮಾಡಿಸಲು ನೆರವಾಗುತ್ತೇವೆ ಎಂದು ಹೇಳಿದೆ.
