IND vs ENG test: ದ್ವಿಶತಕದ ನಿರೀಕ್ಷೆಯಲ್ಲಿ ಯಶಸ್ವಿ ಜೈಸ್ವಾಲ್

Photo Courtesy: Twitter

ವಿಶಾಖಪಟ್ಟಣಂ: ಭಾರತ ಮತ್ತು ಇಂಗ್ಲೆಂಡ್ ನಡುವಿನ ದ್ವಿತೀಯ ಟೆಸ್ಟ್ ಪಂದ್ಯದ ಮೊದಲ ದಿನದಾಟದಲ್ಲಿ ಟೀಂ ಇಂಡಿಯಾ 6 ವಿಕೆಟ್ ನಷ್ಟಕ್ಕೆ 336 ರನ್ ಗಳಿಸಿ ದಿನದಾಟ ಮುಗಿಸಿದೆ.

ಇಂದು ಶತಕ ಗಳಿಸಿ ಮಿಂಚಿದ ಯಶಸ್ವಿ ಜೈಸ್ವಾಲ್ 179 ರನ್ ಗಳಿಸಿ ನಾಳೆಗೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ. ಜೊತೆಗೆ ಚೊಚ್ಚಲ ದ್ವಿಶತಕದ ನಿರೀಕ್ಷೆಯಲ್ಲಿದ್ದಾರೆ. ಇಂದಿನ ದಿನದಾಟದಲ್ಲಿ ಭಾರತ ಉತ್ತಮ ಬ್ಯಾಟಿಂಗ್ ನಡೆಸಿದ್ದು, ನಾಳೆಗೆ ಮತ್ತಷ್ಟು ರನ್ ವಿಸ್ತರಿಸಿ ಎದುರಾಳಿಗೆ ದೊಡ್ಡ ಮೊತ್ತ ಸವಾಲು ನೀಡುವ ವಿಶ್ವಾಸದಲ್ಲಿದೆ.

ದಾಖಲೆಯ ಶತಕ ಸಿಡಿಸಿದ ಜೈಸ್ವಾಲ್
ಯಶಸ್ವಿ ಜೈಸ್ವಾಲ್ ಗೆ ಇದು ಟೆಸ್ಟ್ ಮಾದರಿಯಲ್ಲಿ ಎರಡನೇ ಶತಕವಾಗಿತ್ತು. 23 ವರ್ಷದ ಒಳಗಿನ ಕಿರಿಯ ವಯಸ್ಸಿನಲ್ಲಿ ಭಾರತ ಮತ್ತು ವಿದೇಶದಲ್ಲಿ ಶತಕ ಸಿಡಿಸಿದ ರವಿಶಾಸ್ತ್ರಿ, ಸಚಿನ್ ತೆಂಡುಲ್ಕರ್ ಸೇರಿದಂತೆ ಕೆಲವೇ ಆಟಗಾರರ ಪಟ್ಟಿಗೆ ಅವರೂ ಸೇರಿಕೊಂಡರು. ಹಾಗೆ ನೋಡಿದರೆ ಅವರು ಇಂದೇ ದ್ವಿಶತಕ ಪೂರೈಸಬಹುದು ಎಂಬ ನಿರೀಕ್ಷೆಯಿತ್ತು. ಆದರೆ 150 ರನ್ ಗಳ ನಂತರ ಜೈಸ್ವಾಲ್ ಕೊಂಚ ಎಚ್ಚರಿಕೆಯ ಆಟವಾಡಿದರು. ಕಳೆದ ಪಂದ್ಯದಲ್ಲಿ 80 ರನ್ ಗೆ ಔಟಾಗಿ ಶತಕ ವಂಚಿತರಾಗಿ ನಿರಾಸೆ ಅನುಭವಿಸಿದ್ದರು. ಆ ನಿರಾಸೆಯನ್ನು ಇಂದು ಬಡ್ಡಿ ಸಮೇತ ತೀರಿಸಿಕೊಂಡರು.

ಚೊಚ್ಚಲ ಪಂದ್ಯವಾಡುತ್ತಿರುವ ರಜತ್ ಪಟಿದಾರ್ 32 ರನ್ ಗಳಿಗೆ ತೃಪ್ತಿಪಟ್ಟುಕೊಂಡರು. ಅಕ್ಷರ್ ಪಟೇಲ್ 27 ರನ್ ಗಳ ಕೊಡುಗೆ ನೀಡಿದರು. ದಿನದಂತ್ಯಕ್ಕೆ ವಿಕೆಟ್ ಕಾಯ್ದುಕೊಳ್ಳುವಲ್ಲಿ ವಿಫಲರಾದ ವಿಕೆಟ್ ಕೀಪರ್ ಬ್ಯಾಟಿಗ ಕೆಎಸ್ ಭರತ್ 17 ರನ್ ಗೆ ಔಟಾದರು. ಇದರಿಂದಾಗಿ ಭಾರತಕ್ಕೆ ಕೊಂಚ ಹಿನ್ನಡೆಯಾಯಿತು.

ಅತ್ತ ಇಂಗ್ಲೆಂಡ್ ಪರ ಶೊಯೇಬ್ ಬಾಶಿರ್, ರೆಹಾನ್ ಅಹ್ಮದ್ ತಲಾ 2, ಜೇಮ್ಸ್ ಆಂಡರ್ಸನ್, ಟಾಮ್ ಹಾರ್ಟ್ಲೀ ತಲಾ 1 ವಿಕೆಟ್ ಕಬಳಿಸಿದರು.