ಆಸ್ಟ್ರೇಲಿಯಾ ಆಲ್‌ರೌಂಡರ್ ಜೇಮ್ಸ್ ಫಾಕ್ನರ್ ಅವರ ವಿರುದ್ಧ ಗ್ರೇಟರ್ ಮ್ಯಾಂಚೆಸ್ಟರ್ ಪೊಲೀಸ್ ಮಧ್ಯಪಾನ ಸೇವಿಸಿ ವಾಹನ ಚಾಲನೆ ಮಾಡಿದ ಆರೋಪವನ್ನು ಹೊರಿಸಿದೆ. ಫಾಕ್ನರ್ ಅವರನ್ನು ಜಾಮೀನಿನ ಮೇಲೆ ಬಿಡುಗಡೆ ಮಾಡಲಾಗಿದ್ದು, ಜುಲೈ 21ರಂದು ಮ್ಯಾಂಚೆಸ್ಟರ್‌ನಲ್ಲಿ ಕೋರ್ಟ್ ವಿಚಾರಣೆ ಎದುರಿಸಲಿದ್ದಾರೆ. ಯುಕೆಯ ಕಾನೂನುಬದ್ಧ ಮಿತಿಗಿಂತ ಫಾಕ್ನರ್ ರಕ್ತದಲ್ಲಿ ಆಲ್ಕೋಹಾಲ್ ರೀಡಿಂಗ್ ಎರಡು ಪಟ್ಟು ಹೆಚ್ಚಿಗೆಯಿತ್ತು.
ಇಂಗ್ಲೆಂಡ್ ಸ್ಥಳೀಯ ಕ್ರಿಕೆಟ್ ಸ್ಪರ್ಧೆಗಳಲ್ಲಿ ಫಾಕ್ನರ್ ಲಂಕಾಶೈರ್ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ. ಕ್ರಿಕೆಟ್ ಆಸ್ಟ್ರೇಲಿಯಾದ ನಡವಳಿಕೆ ಸಂಹಿತೆ ಅನ್ವಯ ಕೂಡ ಅವರು ಆರೋಪಗಳನ್ನು ಎದುರಿಸಲಿದ್ದಾರೆ.
ಕ್ರಿಕೆಟ್ ಆಸ್ಟ್ರೇಲಿಯಾ ಎಕ್ಸಿಕ್ಯೂಟಿವ್ ಜನರಲ್ ಮ್ಯಾನೇಜರ್ ಪ್ಯಾಟ್ ಹೊವಾರ್ಡ್ ಈ ಕುರಿತು ಮಾತನಾಡುತ್ತಾ, ತಾವು ಜೇಮ್ಸ್ ಜತೆ ಸಂಪರ್ಕ ಹೊಂದಿ ವಿಷಯವನ್ನು ತಿಳಿದುಕೊಂಡೆ. ಯುವಜನರಿಗೆ ಮಾದರಿಯಾಗಬೇಕಿದ್ದ ಅವರು ತಮ್ಮ ಕ್ರಿಯೆಯಿಂದ ನಿರಾಶೆಗೊಂಡಿದ್ದು, ಮುಜುಗರಕ್ಕೀಡಾಗಿರುವುದು ಸ್ಪಷ್ಟವಾಗಿದೆ.
ನಾನು ಕೂಡ ತೀವ್ರ ನಿರಾಶೆ ವ್ಯಕ್ತಪಡಿಸಿದ್ದು,ಇಂಗ್ಲೀಷ್ ಕಾನೂನು ಮತ್ತು ಕ್ರಿಕೆಟ್ ಆಸ್ಟ್ರೇಲಿಯಾ ನಿಯಮಗಳ ಅನ್ವಯದ ಪರಿಣಾಮಗಳ ಬಗ್ಗೆ ಅವರಿಗೆ ಮಾಹಿತಿ ನೀಡಿದ್ದಾಗಿ ತಿಳಿಸಿದರು. ಏತನ್ಮಧ್ಯೆ, ಫಾಕ್ನರ್ ಅವರನ್ನು ಯಾರ್ಕ್‌ಶೈರ್ ವೈಕಿಂಗ್ಸ್ ವಿರುದ್ಧ ನ್ಯಾಟ್‌ವೆಸ್ಟ್ ಟಿ20 ಬ್ಲಾಸ್ಟ್ ಪಂದ್ಯಕ್ಕೆ ಆಯ್ಕೆ ಮಾಡುವುದಿಲ್ಲ ಎಂದು ಲಂಕಾಶೈರ್ ಕೌಂಟಿ ಕ್ರಿಕೆಟ್ ಕ್ಲಬ್ ಖಚಿತಪಡಿಸಿದೆ.