ಭಾರತ-ಪಾಕ್ ಹೈವೋಲ್ಟೇಜ್ ಕದನ: ಟೀಂ ಇಂಡಿಯಾಗೆ ಯೋಧರಿಂದ ಶುಭ ಹಾರೈಕೆ

ವಾಘಾ:ಪ್ರತಿಷ್ಠಿತ ಐಸಿಸಿ ಚಾಂಪಿಯನ್ಸ್‌ ಟ್ರೋಫಿಯ ಬಹುನಿರೀಕ್ಷಿತ ಭಾರತ-ಪಾಕಿಸ್ತಾನ ತಂಡಗಳ ನಡುವಿನ ಹೈವೊಲ್ಟೇಜ್‌ ಪಂದ್ಯ ಇಂದು ನಡೆಯಲಿದ್ದು, ಇಂಗ್ಲೆಂಡ್‌ನ ಏಡ್ಜ್‌ಬಾಸ್ಟನ್‌ ಮೈದಾನದಲ್ಲಿ ಸಾಂಪ್ರದಾಯಿಕ ಎದುರಾಳಿ ತಂಡಗಳು ಮುಖಾಮುಖಿಯಾಗಲಿವೆ. ಈ ಹಿನ್ನಲೆಯಲ್ಲಿ ಕೊಹ್ಲಿ ಟೀಂ ಗೆ ಭಾರತೀಯ ಸೇನೆ ಶುಭ ಹಾರೈಸಿದೆ.

ಜಮ್ಮು-ಕಾಶ್ಮೀರದ ಯೋಧರು ಟೀಂ ಇಂಡಿಯಾ ತಂಡಕ್ಕೆ ಶುಭ ಹಾರೈಕೆಯ ಸಂದೇಶ ಕಳಿಸಿದ್ದು, ಭಾರತೀಯ ತಂಡ ಪಂದ್ಯದಲ್ಲಿ ಜಯಗಳಿಸಲಿದೆ ಎಂದು ವಿಶ್ವಾಸವ್ಯಕ್ತಪಡಿಸಿದ್ದಾರೆ. "ಹಮ್ ಹಿಂದೂಸ್ಥಾನಿ ಹಮ್ ಹಿಂದೂಸ್ಥಾನಿ", "ಸುನೊ ಗೌರ್ ಸೆ ದುನಿಯಾ ವಾಲೊ, ಬುರಿ ನಜರ್ ನ ಹಂಪೆ ದೌಲೊ" ಹಾಡು ಹಾಡುವ ಮೂಲಕ ಯೋಧರು ಭಾರತ ತಂಡಕ್ಕೆ ಶುಭ ಕೋರಿದ್ದಾರೆ.

ಈ ಹಿಂದೆ ಹಲವು ಬಾರಿ ಪಾಕಿಸ್ತಾನವನ್ನು ಸೋಲಿಸಿದ್ದೇವೆ, ಈ ಬಾರಿಯೂ ಪಾಕಿಸ್ತಾನ ಸೋಲಲಿದೆ, ಪಂದ್ಯ ವೀಕ್ಷಿಸಲು ಕಾತರದಿಂದ ಕಾಯುತ್ತಿದ್ದೇವೆ ಎಂದು ಬಿಎಸ್ ಎಫ್ ಯೋಧರು ತಿಳಿಸಿದ್ದಾರೆ.