ಮುಂಬೈ: ಬಿಸಿಸಿಐಯಲ್ಲಿ ಅಧ್ಯಕ್ಷ, ಕಾರ್ಯದರ್ಶಿಗಳೆಲ್ಲರೂ ಅಧಿಕಾರ ಕಳೆದುಕೊಂಡು ಮೂಲೆ ಸೇರಿದ್ದಾರೆ. ಹೀಗಿರುವಾಗ ಕ್ರಿಕೆಟ್ ಸರಣಿ ನಡೆಯುವುದೇ ಕಷ್ಟ ಎಂದು ಪದಚ್ಯುತ ಕಾರ್ಯದರ್ಶಿ ಅಜಯ್ ಶಿರ್ಕೆ ಫಿಟ್ಟಿಂಗ್ ಇಟ್ಟಿದ್ದಕ್ಕೆ ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಗೆ ಆತಂಕವಾಗಿದೆ. ಆದರೆ ಅವರಿಗೆ ಬಿಸಿಸಿಐ ಅಭಯ ನೀಡಿದೆ.
ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಗೆ ಕರೆ ಮಾಡಿದ್ದ ಅಜಯ್ ಶಿರ್ಕೆ ಈ ಸರಣಿ ನಡೆಯುವುದೇ ಅನುಮಾನ ಎಂದು ಬಾಂಬ್ ಸಿಡಿಸಿದ್ದರು. ಇದರಿಂದ ಕಳವಳಗೊಂಡಿದ್ದ ಇಸಿಬಿ ಬಿಸಿಸಿಐ ಸಿಇಒ ರಾಹುಲ್ ಜೋಹ್ರಿಗೆ ಪತ್ರ ಬರೆದು ತಮ್ಮ ಅಳಲು ತೋಡಿಕೊಂಡಿದ್ದಾರೆ.
ಇದಕ್ಕೆ ಉತ್ತರಿಸಿರುವ ಜೋಹ್ರಿ ಉಭಯ ದೇಶಗಳ ಕ್ರಿಕೆಟ್ ಸರಣಿಗೆ ಯಾವುದೇ ತೊಂದರೆಯಿಲ್ಲ ಎಂದು ಅಭಯವಿತ್ತಿದ್ದಾರೆ. “ನಮ್ಮ ತಂಡಕ್ಕೆ ಅಗತ್ಯವಾದ ಎಲ್ಲಾ ಅನುಕೂಲಗಳನ್ನೂ ಮಾಡಿಕೊಡುತ್ತೀರಲ್ಲಾ? ಅದರಲ್ಲೂ ವಿಶೇಷವಾಗಿ ಆಟಗಾರರ ಭತ್ಯೆ, ಉಳಕೊಳ್ಳುವ ವ್ಯವಸ್ಥೆ ಪ್ರಯಾಣ ವ್ಯವಸ್ಥೆ ಬಗ್ಗೆ ನಮಗೆ ಕಳವಳವಿದೆ” ಇಸಿಬಿ ಬಿಸಿಸಿಐಗೆ ಪತ್ರ ಬರೆದಿತ್ತು.
ಇದಕ್ಕೆ ಉತ್ತರಿಸಿದ ಬಿಸಿಸಿಐ ಈಗಾಗಲೇ ತಂಡ ಘೋಷಿಸಲಾಗಿದ್ದು, ಕ್ರಿಕೆಟ್ ಸರಣಿ ಯಾವುದೇ ತೊಂದರೆಯಾಗದಂತೆ ನಡೆಯಲಿದೆ ಎಂದು ಬಿಸಿಸಿಐ ಭರವಸೆ ನೀಡಿದೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ