ಜಿಂಬಾಬ್ವೆ ವಿರುದ್ಧ ಮೊದಲ ಏಕದಿನ: ಜಯದ ನಿರೀಕ್ಷೆಯಲ್ಲಿ ಧೋನಿ ಬಳಗ

ಮಹೇಂದ್ರ ಸಿಂಗ್ ಧೋನಿ ಸಾರಥ್ಯದ ಯುವ ತಂಡವು ಕಡಿಮೆ ಶ್ರೇಯಾಂಕದ ಜಿಂಬಾಬ್ವೆ ವಿರುದ್ಧ ಮೂರು ಪಂದ್ಯಗಳ ಸರಣಿಯ ಮೊದಲ ಏಕ ದಿನ ಅಂತಾರಾಷ್ಟ್ರೀಯ ಪಂದ್ಯವನ್ನು ಶನಿವಾರ ಆಡಲಿದ್ದು, ಭಾರತ ಫೇವರಿಟ್ ಎನಿಸಿಕೊಂಡಿದೆ. ಆದರೆ ಜಯಕ್ಕಿಂತ ಹೆಚ್ಚಾಗಿ ಈ ಪ್ರವಾಸವು ಭಾರತದ ಭವಿಷ್ಯದ ಭರವಸೆಯ ಆಟಗಾರರನ್ನು ಗುರುತಿಸುತ್ತದೆಂದು ನಿರೀಕ್ಷಿಸಲಾಗಿದೆ. 

ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ, ಶಿಖರ್ ಧವನ್ ಮತ್ತು ಅಶ್ವನ್ ಮುಂತಾದ ಹಿರಿಯ ಆಟಗಾರರಿಗೆ ವಿಶ್ರಾಂತಿ ನೀಡಲಾಗಿದ್ದು, ಎರಡನೇ ಆಯ್ಕೆಯ ತಂಡವನ್ನು ಮುನ್ನಡೆಸುವಲ್ಲಿ ಧೋನಿ ಸವಾಲು ಎದುರಿಸಿದ್ದಾರೆ. ಸುರೇಶ್ ರೈನಾ ಮತ್ತು ರಹಾನೆ ಜಿಂಬಾಬ್ವೆಯಲ್ಲಿ ಭಾರತದ ಪ್ರಾಯೋಗಿಕ ಸೀಮಿತ ಓವರುಗಳ ತಂಡಕ್ಕೆ ನಾಯಕತ್ವ ವಹಿಸಿದ್ದರು. ಆದರೆ ಜಿಂಬಾಬ್ವೆಯಲ್ಲಿ ಧೋನಿ ನಾಯಕರಾಗಿ ಇದೇ ಮೊದಲ ಬಾರಿಗೆ ಆಡುತ್ತಿರುವುದು.

ಇದೊಂದು ಭಿನ್ನ ಅನುಭವವಾಗಲಿದೆ. ದ್ವಿಪಕ್ಷೀಯ ಸರಣಿಯಲ್ಲಿ ಕೆಲವು ಆಟಗಾರರ ಜತೆ ಮೊದಲ ಬಾರಿ ಆಡುತ್ತಿದ್ದೇನೆ ಎಂದು ಜಿಂಬಾಬ್ವೆಗೆ ನಿರ್ಗಮಿಸುವ ಮುಂಚೆ ಧೋನಿ ಹೇಳಿದ್ದರು.  ಅವರ ಬಲಗಳೇನು ಎನ್ನುವುದನ್ನು ಶೀಘ್ರದಲ್ಲೇ ಅಂದಾಜು ಮಾಡಿ ತಂಡದ ರಚನೆ ಆಧರಿಸಿ, ಆಟಗಾರರನ್ನು ಹೇಗೆ ಬಳಸಿಕೊಳ್ಳಬಹುದೆಂದು ಯೋಚಿಸುತ್ತೇನೆ. ತಂಡದ ಸಂಯೋಜನೆ ಚೆನ್ನಾಗಿ ಕಾಣುತ್ತಿದೆ ಎಂದು ಧೋನಿ ಪ್ರತಿಕ್ರಿಯಿಸಿದ್ದರು.

 ಸರಣಿ ಜಯವನ್ನು ಪ್ರತಿಯೊಬ್ಬರೂ ನಿರೀಕ್ಷಿಸಿದ್ದು, ಇದೇ ಸಂದರ್ಭದಲ್ಲಿ ಅನಿರೀಕ್ಷಿತ ಫಲಿತಾಂಶ ಬಂದರೆ ಧೋನಿಯ ಕ್ರಿಕೆಟ್ ಭವಿಷ್ಯದ ಮೇಲೆ  ದೊಡ್ಡ ಪೆಟ್ಟು ಬೀಳುವ ಸಾಧ್ಯತೆಯಿದೆ.

ಮುಂದಿನ ತವರು ವೇಳಾಪಟ್ಟಿಯಲ್ಲಿ ಟೆಸ್ಟ್ ಪಂದ್ಯಗಳೇ ಹೆಚ್ಚಾಗಿದ್ದು, ಭಾರತ ಕೆಲವೇ ಏಕದಿನ ಮತ್ತು ಟಿ 20ಗಳನ್ನು ಈ ಸೀಸನ್‌ನಲ್ಲಿ ಆಡಲಿದೆ. ಧೋನಿ ಟೆಸ್ಟ್ ಮಾದರಿಯಿಂದ ನಿವೃತ್ತಿಯಾಗಿರುವುದರಿಂದ ಧೋನಿಯ ಆಟ ನೋಡಲು ಇದೊಂದು ಕೊನೆಯ ಅವಕಾಶವಾಗಿದೆ.

 ಜಿಂಬಾಬ್ವೆ ಪ್ರವಾಸದ ಬಳಿಕ ವಿರಾಟ್ ಕೊಹ್ಲಿ ನೇತೃತ್ವದ ಭಾರತ ತಂಡ ಟೆಸ್ಟ್ ಪ್ರವಾಸಕ್ಕೆ ಕೆರಿಬಿಯನ್‌ಗೆ ತೆರಳಲಿದೆ.

ಈಗಿರುವ ತಂಡದಲ್ಲಿ ಕೆಎಲ್ ರಾಹುಲ್ ಅವರನ್ನು ಬಿಟ್ಟರೆ ಇತರೆ ಯುವ ಆಟಗಾರರ ಪೈಕಿ ಯಾರೊಬ್ಬರೂ ವೆಸ್ಟ್ ಇಂಡೀಸ್ ಪ್ರವಾಸದಲ್ಲಿ ಇರುವುದಿಲ್ಲ. ಮನೀಶ್ ಪಾಂಡೆಗೆ ಜಿಂಬಾಬ್ವೆ ಸುವರ್ಣ ಅವಕಾಶವಾಗಿದೆ. ಉತ್ತಮ ಪ್ರದರ್ಶನ ನೀಡಿದರೆ ಭವಿಷ್ಯದಲ್ಲಿ 11 ಮಂದಿಯ ತಂಡದಲ್ಲಿ ರೈನಾಗೆ ಬದಲಿಯಾಗಿ ಆಡಬಹುದು.

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ