ಈಗಂತೂ ಬಾಲಿವುಡ್‌ನಲ್ಲಿ ಮಾತ್ರವಲ್ಲ ಭಾರತದೆಲ್ಲೆಡೆ ಹೆಚ್ಚು ಸುದ್ದಿ ಆಗುತ್ತಿರುವ ಸಂಗತಿ ಅಂದ್ರೆ ಪ್ರಿಯಾಂಕ ಚೋಪ್ರ ನಟನೆಯ ಮೇರಿಕೋಮ್. ಈ ಚಿತ್ರವನ್ನು ವೀಕ್ಷಿಸಿದ ಶಿಲ್ಪ ಶೆಟ್ಟಿ ಬಿಕ್ಕಿ ಬಿಕ್ಕಿ ಅತ್ತರಂತೆ. ಆ ಚಿತ್ರದ ದೃಶ್ಯಗಳು, ಪ್ರಿಯಾಂಕ ನಟನೆಯನ್ನು ತನ್ಮಯತೆಯಿಂದ ವೀಕ್ಷಿಸಿದ ಈ ನಟಿಗೆ ಅಳು ತಡೆಯಲು ಆಗಲೇ ಇಲ್ಲವಂತೆ. ಸೆಪ್ಟೆಂಬರ್ 5 ರಂದು ಬಿಡುಗಡೆ ಆದ ಮೇರಿಕೋಂ ಚಿತ್ರ ವಿಮರ್ಶಕರನ್ನು ಮಾತ್ರವಲ್ಲದೆ ಸಾಮಾನ್ಯರ ಮನ ಸೆಳೆದ ಚಿತ್ರವಾಗಿದೆ. ಬಾಕ್ಸರ್ ಜೀವನಾಧಾರಿತ ಚಿತ್ರವಾಗಿರುವ ಮೇರಿಕೋಂನಲ್ಲಿ ಈ ಹೆಸರಿನ ಪಾತ್ರಧಾರಿಯಾಗಿರುವ ಪಿಗ್ಗಿ ಚಾಪ್ಸ್ ನಟನೆಯ ಬಗ್ಗೆ ಟ್ವಿಟ್ವರ್‌ನಲ್ಲಿ ಪ್ರಶಂಸೆ ಮಾಡಿ ಹೇಳಿದ್ದಾರೆ ಶಿಲ್ಪ ಶೆಟ್ಟಿ.
ಮೇರಿಕೋಂ ಚಿತ್ರದಲ್ಲಿ ಪ್ರಿಯಾಂಕ ನಟನೆ ಸೂಪರ್ ಆಗಿದೆ. ಒಮಾಂಗ್ ಕುಮಾರ್ ಅವರ ನಿರ್ದೇಶನವು ಸಹ ಅದ್ಭುತವಾಗಿದೆ. ಈ ಚಿತ್ರವನ್ನು ವೀಕ್ಷಿಸುವಾಗ ಕಣ್ಣೀರು ತಡೆಯಲಾಗಲೇ ಇಲ್ಲ ನನಗೆ. ಪ್ರತಿಯೊಬ್ಬರೂ ನೋಡಲೇ ಬೇಕಾದ ಚಿತ್ರ ಇದಾಗಿದೆ ಎಂದು ಟ್ವೀಟ್ ಮಾಡಿ ಹೇಳಿದ್ದಾರೆ. ಈ ಚಿತ್ರದ ಸೋಲುಗೆಲುವಿನ ಬಗ್ಗೆ ಸಣ್ಣ ಪ್ರಮಾಣದ ಆತಂಕ ಹೊಂದಿದ್ದ ಪಿಗ್ಗಿಗೆ ಅಪರೂಪವಾದ ಗೆಲುವು ಸಿಕ್ಕಿದೆ.. ನೆಮ್ಮದಿಯ ನಿಟ್ಟಿಸಿರು ಬಿಡುವಂತಾಗಿದೆ!
