ಊರ್ಮಿಳಾ ಮಾಂತೋಡ್ಕರ್ ಮರಳಿ ಬಣ್ಣ ಹಚ್ಚುವ ಸುದ್ದಿ ಓದಿದ ಬೆನ್ನಲ್ಲೇ ಮಾಜಿ ಭುವನ ಸುಂದರಿ ಸುಶ್ಮಿತಾ ಸೇನ್ ಅವರು ಕೂಡಾ ಮತ್ತೆ ತೆರೆ ಮೇಲೆ ಕಾಣಿಸಿಕೊಳ್ಳಲಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ. 2010ರಲ್ಲಿ ತೆರೆಕಂಡ ನೋ ಪ್ರಾಬ್ಲಂ ಚಿತ್ರದ ಬಳಿಕ ಅವರು ಬೆಳ್ಳಿಪರದೆಯಿಂದ ನಾಪತ್ತೆಯಾಗಿದ್ದರು. ಈಗ ಮತ್ತೆ ತೆರೆ ಮೇಲೆ ಕಾಣಿಸಿಕೊಳ್ಳಲು ತಯಾರಿ ನಡೆಸುತ್ತಿದ್ದಾರಂತೆ. ತಮ್ಮ ಮೋಹನ ನೋಟದಿಂದ ಪ್ರೇಕ್ಷಕರನ್ನು ಬೆರಗು ಮಾಡುವ ತೊಂಬತ್ತರ ದಶಕದ ಸೌಂದರ್ಯವತಿ ಸುಶ್ಮಿತಾ. ಈಕೆ ಮತ್ತೆ ಬೆಳ್ಳಿತೆರೆಗೆ ಮರಳುತ್ತಿರುವುದು ಅಭಿಮಾನಿಗಳಿಗೆ ಸಖತ್ ಖುಷಿ ನೀಡಿದೆಯಂತೆ.
ತೆರೆ ಮೇಲೆ ಕಾಣಿಸಿಕೊಳ್ಳುತ್ತಿಲ್ಲ ಎಂಬ ಕಾರಣಕ್ಕೆ ಅವರು ಮೈತೂಕದತ್ತ ಗಮನ ಹರಿಸದೆ ಬಿಟ್ಟಿಲ್ಲ. ಈಗ 37ರ ಹರೆಯದಲ್ಲೂ ಅದೇ ಸೌಂದರ್ಯ ಕಾಪಾಡಿಕೊಂಡಿರುವ ಸುಶ್ಮಿತಾ ಸೇನ್ ಹೊಸ ಲುಕ್ನೊಂದಿಗೆ ಪ್ರೇಕ್ಷಕರ ಮುಂದೆ ಕಾಣಿಸಿಕೊಳ್ಳಲಿದ್ದಾರಂತೆ. ಇತ್ತೀಚೆಗೆ ಇಂಡಿಯನ್ ಇಂಟರ್ನ್ಯಾಶನಲ್ ಜ್ಯುವೆಲ್ಲರಿ ವೀಕ್ನಲ್ಲಿ ಪಾಲ್ಗೊಂಡಿದ್ದ ಅವರು ಚಿತ್ರರಂಗಕ್ಕೆ ಮರಳುತ್ತಿರುವ ಬಗ್ಗೆ ಸುಳಿವು ನೀಡಿದ್ದಾರೆ. ಈ ಮೂರು ವರ್ಷ ಸುಶ್ಮಿತಾ ಏನು ಮಾಡುತ್ತಿದ್ದಿರಬಹುದು ಎಂಬ ಪ್ರಶ್ನೆಯೇ. ಅವರು ತಮ್ಮ ಎರಡನೇ ದತ್ತು ಮಗು ಆಲಿಷಾರ ಆರೈಕೆಯಲ್ಲಿ ಬ್ಯುಸಿ ಆಗಿದ್ದರು. ಈಗ ಆಲಿಷಾಗೆ ಮೂರು ವರ್ಷ ತುಂಬಿದೆ. ಈ ಸಂದರ್ಭದಲ್ಲಿ ಮರಳಿ ಬಣ್ಣ ಹಚ್ಚುವ ಆಸೆ ವ್ಯಕ್ತಪಡಿಸಿರುವ ಸುಶ್ಮಿತಾ ನಿರ್ಮಾಪಕರ ನಿರೀಕ್ಷೆಯಲ್ಲಿದ್ದೇನೆ ಎಂದಿದ್ದಾರೆ.