ಗಿನ್ನಿಸ್ ಅಂತರರಾಷ್ಟ್ರೀಯ ಚಾಂಪಿಯನ್ಸ್ ಕಪ್ನಲ್ಲಿ ಜಗತ್ತಿನ ಪ್ರಸಿದ್ಧ ಫುಟ್ಬಾಲ್ ಕ್ಲಬ್ಗಳು ಪಾಲ್ಗೊಳ್ಳುತ್ತಿರುವುದು ಎಲ್ಲರಿಗೂ ತಿಳಿದ ಸಂಗತಿಯೇ. ಹೊಸ ವಿಷಯವೆಂದರೆ ಅಲ್ಲಿ ಪ್ರಸಾರವಾಗಲಿರುವ ಪಂದ್ಯಾವಳಿ ಗೀತೆಯಲ್ಲಿ ಪ್ರಿಯಾಂಕಾ ಚೋಪ್ರಾ ಎಕ್ಸಾಟಿಕ್ ಎಂಬ ಆಂಗ್ಲ ಥೀಮ್ ಗೀತೆಯಲ್ಲಿ ನಟಿಸಿದ್ದಾರೆ. ಪಂದ್ಯಾವಳಿ ನಡೆಯುವ ಅಷ್ಟೂ ದಿನ ಈ ಗೀತೆ ಪ್ರಸಾರವಾಗಲಿರುವುದು ಪ್ರಿಯಾಂಕಾ ಅವರ ಸಂತೋಷ ಹೆಚ್ಚಿಸಲು ಕಾರಣವಾಗಿದೆಯಂತೆ.
ರಿಯಲ್ ಮ್ಯಾಡ್ರಿಡ್, ಚೆಲ್ಸಿ, ಎ ಸಿ ಮಿಲನ್, ಜುವೆಂಟಸ್ ಮೊದಲಾದ ಎಂಟು ತಂಡಗಳು ಟೂರ್ನೀಯಲ್ಲಿ ಪಾಲ್ಗೊಳ್ಳುತ್ತಿವೆ. ಈ ಪಂದ್ಯಾವಳಿಗೆಂದೇ ಯೂನಿವರ್ಸಲ್ ಮ್ಯೂಸಿಕ್ ಹಾಗೂ ಗೆಫೆನ್ ಎ ಆಂಡ್ ಎಂ ಸಂಗೀತ ಸಂಯೋಜಿಸಿವೆ. ಓ ಜೋಶ್ಭರಿತ ಪಾಪ್ ಗೀತೆ ಎಕ್ಸಾಟಿಕ್ನಲ್ಲಿ ಅವರು ನರ್ತಿಸಿದ್ದಾರೆ. ಈ ಗೀತೆಯನ್ನು ಸಿದ್ದಪಡಿಸಿದ್ದು ಪಾಪ್ ಗೀತೆಯ ದೊಡ್ಡ ಹೆಸರು ಪಿಟ್ಬುಲ್.
ಪಿಟ್ಬುಲ್ ಜೊತೆಯಲ್ಲಿ ಮಿಯಾಮಿ ಬೀಚ್ನಲ್ಲಿ ಚಿತ್ರೀಕರಿಸಿರುವ ಈ ಗೀತೆಯಲ್ಲಿ ಪ್ರಿಯಾಂಕಾ ಬಂಗಾರ ಬಣ್ಣದ ಹಾಗೂ ಕಪ್ಪು ಈಜುಡುಗೆ ತೊಟ್ಟು ಇಂಗ್ಲಿಷ್ ಗೀತೆಗೆ ತುಟಿಯಾಡಿಸಿದ್ದಾರೆ. ವಿದೇಶಿ ನಟಿಯರಿಗೆ ಸರಿಸಮನಾಗಿ ನಟಿಸಿರುವ ಈ ವಿಡಿಯೋ ತುಣುಕು ಈಗಾಗಲೇ ಭಾರೀ ಪ್ರಸಿದ್ದವಾಗಿದೆ. ಈ ಪಂದ್ಯಾವಳಿ ಜುಲೈ 27ರಿಂದ ಆಗಸ್ಟ್ 7ರವರೆಗೆ ಅಮೆರಿಕಾದ ಆರು ಮೈದಾನಗಳಲ್ಲಿ ನಡೆಯಲಿದೆ.