ಡಬಲ್ಸ್ ವಿಭಾಗದಲ್ಲಿ ಭಾರತೀಯರ ಹೋರಾಟ ಅಂತ್ಯ

ಅಗ್ರ ಶ್ರೇಯಾಂಕಿತ ಜೋಡಿ ಮಹೇಶ್ ಭೂಪತಿ ಮತ್ತು ಮಾರ್ಕ್ ನೋವ್ಲ್ಸ್ ಚೆನ್ನೈ ಓಪನ್‌ನ ಡಬಲ್ಸ್ ವಿಭಾಗದಿಂದ ಹೊರ ಬಿದ್ದಿದ್ದಾರೆ. ತಮ್ಮ ಪ್ರತಿಸ್ಪರ್ಧಿಗಳಾದ ಸ್ವಿಟ್ಜರ್ಲ್ಯಾಂಡಿನ ಜೀನ್ ಕ್ಲೌಡ್ ಸ್ಚೆರರ್ ಮತ್ತು ಸ್ಟಾನಿಸ್ಲಾಸ್ ವಾರ್ವಿಂಕಾರೆದುರು ಕ್ವಾರ್ಟರ್ ಫೈನಲಿನಲ್ಲಿ ಇವರು ಸೋಲೊಪ್ಪಿಕೊಂಡರು.

ಶುಕ್ರವಾರ ನಡೆದ ಈ ಅಂತಿಮ ಎಂಟರ ಘಟ್ಟದ ಓಪನ್ ಟೂರ್ನಮೆಂಟಿನ ಪಂದ್ಯದಲ್ಲಿ ಭೂಪತಿ-ನೋವ್ಲ್ಸ್ ಜೋಡಿ 6-3, 3-6, 8-10ರಿಂದ ಪರಾಜಯಗೊಂಡು ತಮ್ಮ ಹೋರಾಟವನ್ನು ಅಂತ್ಯಗೊಳಿಸಿದರು. ಈ ಬಹಾಮಿಯನ್-ಇಂಡಿಯನ್ ಜತೆಗಾರರು ಮೊದಲ ಸೆಟ್‌ನಲ್ಲಿ ಜಯ ಸಾಧಿಸಿದರಾದರೂ ಎರಡು ಮತ್ತು ಮ‌ೂರನೇ ಸುತ್ತಿನಲ್ಲಿನ ನೀರಸ ಪ್ರದರ್ಶನದಿಂದ ಸೋಲು ಇವರ ಪಾಲಾಗಿದೆ.

ಈ ಹಿಂದಿನ ಸುತ್ತುಗಳಲ್ಲಿ ಯ‌ೂಕಿ ಭಾಂಬ್ರಿ- ಹರ್ಷ ಮಂಕಡ್, ರೋಹಣ್ ಬೋಪಣ್ಣ-ಫ್ಲಾವಿಯೋ ಸಿಪೋಲಾ, ಲಿಯಾಂಡರ್ ಪೇಸ್- ಲುಕಾಸ್ ದ್ಲೋಹಿ, ಸೋಮದೇವ್ ದೇವರ್‌ಮನ್- ಪ್ರಕಾಶ್ ಅಮೃತರಾಜ್ ಜೋಡಿಗಳು ನಿರ್ಗಮಿಸಿದ್ದರು. ಉಳಿದಿದ್ದ ಏಕೈಕ ಭಾರತೀಯ ಆಟಗಾರ ಮಹೇಶ್ ಭೂಪತಿ ಕೂಡ ಇದೀಗ ಹೊರ ಬಿದ್ದಿದ್ದು, ಆ ಮ‌ೂಲಕ ಡಬಲ್ಸ್ ವಿಭಾಗದಲ್ಲಿ ಭಾರತೀಯರ ಹೋರಾಟ ಮುಗಿದಂತಾಗಿದೆ.

ಭೂಪತಿ ಜೋಡಿ ಈ ಹಿಂದಿನ ಸುತ್ತಿನಲ್ಲಿ ಸೋಮದೇವ್ ದೇವರ್‌ಮನ್ ಮತ್ತು ಪ್ರಕಾಶ್ ಅಮೃತರಾಜ್‌ರನ್ನು 7-6(3), 7-6(8)ರಿಂದ ಮಣಿಸಿ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ್ದರು.