ಭಾರತದ ನಾಗರಿಕ ಅಲ್ಲದಿದ್ದರೂ ಆಧಾರ್ ಕಾರ್ಡ್ ಇದೆ ಎಂದು ಮತದಾನ ಅವಕಾಶ ನೀಡಬೇಕೇ: ಸುಪ್ರೀಂಕೋರ್ಟ್ ತಪರಾಕಿ

ನವದೆಹಲಿ: ದೇಶದಲ್ಲಿ ಈಗ ಎಸ್ಐಆರ್ ಬಗ್ಗೆ ಭಾರೀ ಚರ್ಚೆಗಳಾಗುತ್ತಿವೆ. ಇದರ ನಡುವೆ ಇದನ್ನು ವಿರೋಧಿಸಿ ಸಲ್ಲಿಸಿದ ಅರ್ಜಿ ವಿಚಾರಣೆ ನಡೆಸಿದ ಸುಪ್ರೀಂಕೋರ್ಟ್ ದೇಶದ ನಾಗರಿಕಲ್ಲದಿದ್ದರೂ ಆಧಾರ್ ಕಾರ್ಡ್ ಇದೆ ಎಂದು ಮತದಾನದ ಅವಕಾಶ ನೀಡಬೇಕೇ ಎಂದು ತಪರಾಕಿ ನೀಡಿದೆ.

ಚುನಾವಣಾ ಆಯೋಗ ಎಸ್ಐಆರ್ ಪ್ರಕ್ರಿಯೆ ನಡೆಸುತ್ತಿದೆ. ಇದಕ್ಕೆ ಪ್ರತಿಪಕ್ಷಗಳ ವಿರೋಧವಿದೆ. ಸುಪ್ರೀಂಕೋರ್ಟ್ ನಲ್ಲಿ ಎಸ್ಐಆರ್ ವಿರೋಧಿಸಿ ಹಲವು ಅರ್ಜಿಗಳು ದಾಖಲಾಗಿವೆ. ಇದರ ಬಗ್ಗೆ ವಿಚಾರಣೆ ನಡೆಸಿದ ಸುಪ್ರೀಂಕೋರ್ಟ್ ಚುನಾವಣಾ ಆಯೋಗದ ಕರ್ತವ್ಯದಲ್ಲಿ ನಾವು ಮೂಗು ತೂರಿಸಲು ಸಾಧ್ಯವಿಲ್ಲ. ಕೆಲವೊಂದು ನ್ಯೂನ್ಯತೆಗಳಿದ್ದರೆ ಸರಿಪಡಿಸಬಹುದಷ್ಟೇ ಎಂದಿದೆ.

ಅಲ್ಲದೆ, ಮತದಾನ ಪಟ್ಟಿ ಪರಿಷ್ಕರಣೆ ವಿರೋಧ ಸಮರ್ಥಿಸಿಕೊಂಡ ಹಿರಿಯ ವಕೀಲ್ ಕಪಿಲ್ ಸಿಬಲ್ ಎಲ್ಲರ ಬಳಿಯೂ ಆಧಾರ್ ಕಾರ್ಡ್ ಇದೆ. ಅದರಲ್ಲೇ ಜನ್ಮದಿನಾಂಕ, ವಯಸ್ಸು ಎಲ್ಲಾ ವಿವರವಿದೆಯಲ್ಲಾ ಎಂದು ವಾದ ಮಂಡಿಸಿದ್ದಾರೆ.

ಇದಕ್ಕೆ ಸುಪ್ರೀಂ ಪೀಠ, ಹಾಗಿದ್ದರೆ ದೇಶದ ನಾಗರಿಕಲ್ಲದಿದ್ದರೂ ಆಧಾರ್ ಕಾರ್ಡ್ ಇದೆ ಎಂದು ಅವರನ್ನು ಮತದಾರ ಎಂದು ಪರಿಗಣಿಸಬೇಕೇ ಎಂದು ಮರುಪ್ರಶ್ನಿಸಿದೆ. ಕೆಲಸಕ್ಕಾಗಿ ಇಲ್ಲಿಗೆ ಹಲವು ದೇಶಗಳಿಂದ ಬಂದು ನೆಲೆಸುತ್ತಾರೆ. ಅವರು ಆಧಾರ್ ಕಾರ್ಡ್ ಮಾಡಿಸಿದ್ದಾರೆ ಎಂದು ಇಲ್ಲಿನ ಸಬ್ಸಿಡಿ ಮತ್ತಿತರ ಪ್ರಯೋಜನ ಪಡೆಯಬಹುದು. ಹಾಗಂತ ಅವರನ್ನೆಲ್ಲಾ ದೇಶದ ನಾಗಕರಿಕರು ಎಂದು ಮತದಾನದ ಅವಕಾಶ ನೀಡಲು ಹೇಗೆ ಸಾಧ್ಯ? ಎಂದು ನ್ಯಾಯಮೂರ್ತಿ ಬಾಗ್ಚಿ ಪ್ರಶ್ನೆ ಮಾಡಿದ್ದಾರೆ.