ಉಡುಪಿಯಲ್ಲಿ ಪ್ರಧಾನಿ ಮೋದಿ: ಚಿತ್ರ ಹಿಡಿದು ನಿಂತಿದ್ದ ಮಕ್ಕಳಿಗೆ ಮೋದಿ ಹೇಳಿದ್ದೇನು

ಉಡುಪಿ: ಕೃಷ್ಣನಗರಿ ಉಡುಪಿಗೆ ಭೇಟಿ ನೀಡಿದ ಪ್ರಧಾನಿ ಮೋದಿ ಇಂದು ಭಾಷಣದ ಆರಂಭಕ್ಕೂ ಮೊದಲೇ ತಮಗಾಗಿ ಚಿತ್ರ ಹಿಡಿದು ನಿಂತಿದ್ದ ಮಕ್ಕಳನ್ನು ನೋಡಿ ನಿಂತಿಲ್ಲಿಯೇ ಘೋಷಣೆಯೊಂದನ್ನು ಮಾಡಿದ್ದಾರೆ.

ಪ್ರಧಾನಿ ಮೋದಿಯನ್ನು ನೋಡಲು ಇಂದು ಸಾಕಷ್ಟು ಮಂದಿ ಸಭಾ ಕಾರ್ಯಕ್ರಮದಲ್ಲೂ ಉಪಸ್ಥಿತರಿದ್ದರು. ವಿಶೇಷವಾಗಿ ಕೆಲವು ಮಕ್ಕಳು ಶ್ರೀಕೃಷ್ಣ ಮತ್ತು ಮೋದಿ ಫೋಟೋ ಹಿಡಿದುಕೊಂಡು ನಿಂತಿದ್ದರು. ವೇದಿಕೆಯಲ್ಲಿದ್ದ ಪ್ರಧಾನಿ ಮೋದಿ ಇದನ್ನು ಗಮನಿಸಿದ್ದರು.

ಹೀಗಾಗಿ ಭಾಷಣ ಮಾಡಲು ಮೈಕ್ ಮುಂದೆ ಬರುತ್ತಿದ್ದಂತೇ, ‘ನಾನು ಭಾಷಣ ಆರಂಭಿಸುವ ಮೊದಲು ಒಂದು ವಿಚಾರ ಹೇಳಲು ಬಯಸುತ್ತೇನೆ. ಇಲ್ಲಿ ಕೆಲವು ಮಕ್ಕಳು ಫೋಟೋ ಹಿಡಿದುಕೊಂಡು ನಿಂತಿದ್ದಾರೆ. ಭದ್ರತಾ ಸಿಬ್ಬಂದಿ ಸ್ವಲ್ಪ ಅವರ ಕೈಯಿಂದ ಫೋಟೋ ಪಡೆದು ನನಗೆ ಕೊಡಿ. ಫೋಟೋ ಹಿಂದೆ ನಿಮ್ಮ  ವಿಳಾಸ  ಬರೆದುಕೊಡಿ. ನಾನು ಖಂಡಿತಾ ನಿಮಗೆ ಪತ್ರ ಬರೆಯುತ್ತೇನೆ. ನೀವು ಫೋಟೋ ಹಿಡಿದು ನಿಂತುಕೊಂಡೇ ಇರುವುದು ನನಗೆ ದುಃಖ ಉಂಟುಮಾಡುತ್ತದೆ’ ಎಂದರು. ಬಳಿಕ ಭದ್ರತಾ ಸಿಬ್ಬಂದಿಗಳು ಸ್ವಯಂ ಕಾರ್ಯಕರ್ತರು ಫೋಟೋಗಳನ್ನು ಸಂಗ್ರಹಿಸಿದರು.