ಮುಂಬೈ: ಈಚೆಗೆ ನಿಧನರಾದ ಹಿರಿಯ ನಟ ಧರ್ಮೇಂದ್ರ ಅವರ ಸ್ಮರಣಾರ್ಥ ಪ್ರಾರ್ಥನಾ ಸಭೆಯನ್ನು ಆಯೋಜಿಸಲಾಗಿತ್ತು. ಆದರೆ, ಎಲ್ಲರ ಗಮನ ಸೆಳೆದದ್ದು ಅವರ ಎರಡನೇ ಪತ್ನಿ ಹೇಮಾ ಮಾಲಿನಿ ಮತ್ತು ಅವರ ಪುತ್ರಿಯರಾದ ಇಶಾ ಡಿಯೋಲ್ ಮತ್ತು ಅಹಾನಾ ಡಿಯೋಲ್ ಅವರ ಅನುಪಸ್ಥಿತಿ.
ಧರ್ಮೇಂದ್ರ ಅವರ ಮೊದಲ ಪತ್ನಿ ಪ್ರಕಾಶ್ ಕೌರ್ ಹಾಗೂ ಈ ದಂಪತಿಯ ಮಕ್ಕಳಾದ ಸನ್ನಿ ಡಿಯೋಲ್ ಹಾಗೂ ಬಾಬಿ ಡಿಯೋಲ್ ಈ ಶ್ರದ್ದಾಂಜಲಿ ಸಭೆಯನ್ನು ಆಯೋಜಿಸಿದ್ದರು. ಆದರೆ ಈ ಸಭೆಗೆ ಹೇಮಾ ಮಾಲಿನಿ ಹಾಗೂ ಅವರ ಮಕ್ಕಳಿಗೆ ಎಂಟ್ರಿ ಇರಲಿಲ್ಲ.
ವಿಶೇಷವಾಗಿ ಹೇಮಾ ಅವರು ಧರ್ಮೇಂದ್ರ ಅವರನ್ನು ಗೌರವಿಸಲು ತನ್ನ ಸ್ವಂತ ನಿವಾಸದಲ್ಲಿ ಪ್ರತ್ಯೇಕ ಪ್ರಾರ್ಥನೆ ಸಮಾರಂಭವನ್ನು ನಡೆಸಿದ್ದರು.
ಪ್ರಾರ್ಥನಾ ಸಭೆಯ ಉದ್ದಕ್ಕೂ, ಹೇಮಾ ಮಾಲಿನಿ ಅಥವಾ ಅವರ ಹೆಣ್ಣುಮಕ್ಕಳು ಸ್ಥಳಕ್ಕೆ ಆಗಮಿಸಲಿಲ್ಲ. ಬದಲಾಗಿ, ಅದೇ ಸಮಯದಲ್ಲಿ, ಹೇಮಾ ಮಾಲಿನಿ ಅವರ ನಿವಾಸಕ್ಕೆ ಪಂಡಿತರೊಬ್ಬರು ಪ್ರವೇಶಿಸುವುದನ್ನು ಗುರುತಿಸಲಾಯಿತು.
ನಂತರ ಮಹಿಮಾ ಚೌಧರಿ, ಸುನೀತಾ ಅಹುಜಾ ಮತ್ತು ಅವರ ಮಗ ಯಶವರ್ಧನ್ ಸೇರಿದಂತೆ ಹಲವಾರು ಸೆಲೆಬ್ರಿಟಿಗಳು ಹೇಮಾ ಮಾಲಿನಿ ಮನೆಗೆ ಬರುತ್ತಿರುವುದು ಕಂಡುಬಂದಿತು. ಇಶಾ ಡಿಯೋಲ್ ಅವರ ಮಾಜಿ ಪತಿ ಭರತ್ ತಖ್ತಾನಿ ಕೂಡ ಹೇಮಾ ಮಾಲಿನಿ ಅವರ ನಿವಾಸದ ಹೊರಗೆ ಕಾಣಿಸಿಕೊಂಡಿದ್ದಾರೆ.
