Video,ಪಾಕ್‌ನ ಗ್ಯಾಂಗ್‌ಸ್ಟರ್‌ ಉಜೈರ್‌ ಬಲೋಚ್‌ ಸಹೋದರನಿಗೆ ಗುಂಡೇಟು, ಸ್ಥಿತಿ ಗಂಭೀರ

Photo Credit X

ಪಾಕಿಸ್ತಾನದ ಕರಾಚಿಯ ಲಿಯಾರಿಯಲ್ಲಿ ಗುರುವಾರ ಸಂಜೆ, ಪಾಕಿಸ್ತಾನಿ ಗ್ಯಾಂಗ್‌ಸ್ಟರ್ ಮತ್ತು ಈಗ ಅಸ್ತಿತ್ವದಲ್ಲಿಲ್ಲದ 'ಪೀಪಲ್ಸ್ ಅಮಾನ್ ಕಮಿಟಿ'ಯ ಮುಖ್ಯಸ್ಥ ಉಜೈರ್ ಬಲೋಚ್ ಸಹೋದರ ಝುಬೈರ್ ಬಲೋಚ್ ಗುಂಡೇಟು ತಗುಲಿದೆ.

ಬಲೋಚ್ ಅವರ ಸ್ಥಿತಿ ಗಂಭೀರವಾಗಿದೆ ಎಂದು ವರದಿಯಾಗಿದೆ. ಅವರಿಗೆ ಎದೆ ಮತ್ತು ಹೊಟ್ಟೆಯ ಭಾಗದಲ್ಲಿ ಗುಂಡೇಟು ಬಿದ್ದಿದ್ದು, ಅವರನ್ನು ನಗರದ ಸಿವಿಲ್ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಪಾಕಿಸ್ತಾನದ ಪತ್ರಿಕೆ 'ಡಾನ್' ವರದಿ ಮಾಡಿದೆ. ಈ ಗುಂಡಿನ ದಾಳಿಯಲ್ಲಿ ಇಬ್ಬರು ಸಾರ್ವಜನಿಕರಿಗೂ ಗಾಯಗಳಾಗಿವೆ.

ಮೋಟಾರ್‌ಸೈಕಲ್‌ನಲ್ಲಿ ಬಂದ ದಾಳಿಕೋರರು ತಮ್ಮ ಮುಖವನ್ನು ಮುಚ್ಚಿಕೊಂಡಿದ್ದರು ಮತ್ತು ಅಂಗಡಿಯ ಮಾಲೀಕರು ಪ್ರತಿದಾಳಿ ನಡೆಸಿದ ನಂತರ ಅವರು ಪರಾರಿಯಾದರು ಎಂದು 'ಡಾನ್' ವರದಿ ತಿಳಿಸಿದೆ.

ಘಟನೆ ನಡೆದಾಗ ಬಲೋಚ್ ತಮ್ಮ ಮನೆಯ ಹೊರಗಿದ್ದರು ಎಂದು ಹಿರಿಯ ಪೊಲೀಸ್ ಅಧಿಕಾರಿ ಸೈಯದ್ ಅಸದ್ ರಜಾ ತಿಳಿಸಿದ್ದಾರೆ.

2026ರಲ್ಲಿ ಬಿಡುಗಡೆಯಾದ ಭಾರತೀಯ ಗೂಢಚಾರಿ-ಥ್ರಿಲ್ಲರ್ ಚಲನಚಿತ್ರ 'ಧುರಂಧರ್'ನಲ್ಲಿ ಉಜೈರ್ ಬಲೋಚ್ ಪಾತ್ರವನ್ನು ಭಾರತೀಯ ನಟ ದಾನಿಶ್ ಪಾಂಡೋರ್ ನಿರ್ವಹಿಸಿದ್ದರು.

ಝುಬೈರ್ ಬಲೋಚ್ ಅವರನ್ನು 2012ರಲ್ಲಿ ಬಂಧಿಸಲಾಗಿತ್ತು ಮತ್ತು ಕಳೆದ ವರ್ಷದ ಜನವರಿಯಲ್ಲಿ ಬಿಡುಗಡೆ ಮಾಡಲಾಗಿತ್ತು ಎಂದು ವರದಿಯಾಗಿದೆ. ಗ್ಯಾಂಗ್‌ಗಳ ನಡುವಿನ ವೈಷಮ್ಯ ಮತ್ತು ವೈಯಕ್ತಿಕ ದ್ವೇಷ ಸೇರಿದಂತೆ ವಿವಿಧ ಆಯಾಮಗಳಲ್ಲಿ ಪೊಲೀಸರು ಈ ಘಟನೆಯ ತನಿಖೆ ನಡೆಸುತ್ತಿದ್ದಾರೆ ಎಂದು ವರದಿಗಳು ತಿಳಿಸಿವೆ.

ಲಿಯಾರಿಯ ಸಾಮಾಜಿಕ ಕಾರ್ಯಕರ್ತರೊಬ್ಬರು 'ಡಾನ್'ಗೆ ತಿಳಿಸಿದಂತೆ, ಝುಬೈರ್ ಬಲೋಚ್ ಕೆಲವು ತಿಂಗಳ ಹಿಂದೆ "ರಾಜಕೀಯ ಪಕ್ಷ"ವೊಂದಕ್ಕೆ ಸೇರ್ಪಡೆಗೊಂಡಿದ್ದರು ಮತ್ತು ಆ ಪ್ರದೇಶದಲ್ಲಿ ಪಕ್ಷದ ಧ್ವಜಗಳನ್ನು ಹಾರಿಸಿದ್ದರು.

'ಕರಾಚಿ ಕಾರ್ಯಾಚರಣೆ'ಯ ನಂತರ ದುಬೈ ಮತ್ತು ಇರಾನ್‌ಗೆ ಪರಾರಿಯಾಗಿದ್ದ ಕೆಲವು ಗ್ಯಾಂಗ್‌ಸ್ಟರ್‌ಗಳು, ಅಮೆರಿಕ-ಇರಾನ್ ಯುದ್ಧದ ನಂತರ ಮರಳಿದ್ದಾರೆ ಎಂಬ ವದಂತಿಗಳೂ ಇವೆ ಎಂದು ಆ ಕಾರ್ಯಕರ್ತರು ಹೇಳಿದರು.

ಗ್ಯಾಂಗ್‌ಗಳ ನಡುವಿನ ಸಂಘರ್ಷ ಮತ್ತೆ ಆರಂಭವಾಗಬಹುದೆಂಬ ಆತಂಕದಲ್ಲಿ ಸ್ಥಳೀಯ ನಿವಾಸಿಗಳಿದ್ದಾರೆ ಎಂದು ವರದಿಯಾಗಿದೆ.