ನಮಗೆ ದೇವರಂತೆ, ನೇಪಾಳ-ಭಾರತ ಮೈತ್ರಿ ಭವನದಲ್ಲಿ ಸಂತ್ರಸ್ತರಿಗೆ ನೆರವು, ಬೆಂಬಲಕ್ಕಾಗಿ ಭಾರತಕ್ಕೆ ಕೃತಜ್ಞತೆ

Photo Credit X

ನುವಾಕೋಟ್: ಆಗಸ್ಟ್ 26 ರಂದು ನುವಾಕೋಟ್ ಜಿಲ್ಲೆಯಲ್ಲಿ ಸಂಭವಿಸಿದ ಭೀಕರ ಹಠಾತ್ ಪ್ರವಾಹದಿಂದಾಗಿ ನಿರಾಶ್ರಿತರಾದ ಜನರಿಗೆ, 'ನೇಪಾಳ-ಭಾರತ ಮೈತ್ರಿ ಭವನ'ವು ಪ್ರಮುಖ ಆಶ್ರಯ ತಾಣವಾಗಿದೆ. 

ಭಾರತದ ಬೆಂಬಲದೊಂದಿಗೆ ನಡೆಯುತ್ತಿರುವ ಈ ಆಸ್ಪತ್ರೆಯು ಸಂತ್ರಸ್ತರಿಗೆ ಆಶ್ರಯ, ವೈದ್ಯಕೀಯ ಆರೈಕೆ ಮತ್ತು ಅಗತ್ಯ ನೆರವನ್ನು ಒದಗಿಸುತ್ತಿದೆ. ಅನೇಕ ಸಂತ್ರಸ್ತರಿಗೆ, ಈ ಕೇಂದ್ರವು ಕೇವಲ ಆಸ್ಪತ್ರೆಯಾಗಿ ಉಳಿದಿಲ್ಲ; ಅದಕ್ಕೂ ಮಿಗಿಲಾದ ಆಶ್ರಯ ತಾಣವಾಗಿದೆ. ತುಲನಾತ್ಮಕವಾಗಿ ಎತ್ತರದ ಪ್ರದೇಶದಲ್ಲಿರುವ ಮೈತ್ರಿ ಭವನವು, ಭೋಟೆ ಕೋಶಿ ನದಿಯ ಪ್ರವಾಹದಿಂದಾಗಿ ತಮ್ಮ ಮನೆಗಳು ಮತ್ತು ಆಸ್ತಿಪಾಸ್ತಿಗಳನ್ನು ಕಳೆದುಕೊಂಡ ನೂರಾರು ಜನರಿಗೆ ಸುರಕ್ಷಿತ ತಾಣವನ್ನು ಒದಗಿಸಿದೆ. 

ಆಯುರ್ವೇದ ಮತ್ತು ಪರ್ಯಾಯ ವೈದ್ಯಕೀಯ ಆಸ್ಪತ್ರೆಯನ್ನು ಹೊಂದಿರುವ ಈ ಕಟ್ಟಡವನ್ನು, 2015ರ ಭೂಕಂಪದ ನಂತರ ಭಾರತೀಯ ರಾಯಭಾರ ಕಚೇರಿಯ ಆರ್ಥಿಕ ನೆರವಿನೊಂದಿಗೆ ಪುನರ್‌ ನಿರ್ಮಿಸಲಾಗಿತ್ತು.

ಎಎನ್‌ಐ ಜೊತೆ ಮಾತನಾಡಿದ ಆಸ್ಪತ್ರೆಯ ಮುಖ್ಯಸ್ಥ ಡಾ. ನರೇಂದ್ರ ಪ್ರಸಾದ್ ಗಿರಿ, ಬೇರೆಡೆಗೆ ಹೋಗಲು ದಾರಿಯಿಲ್ಲದ ನಿರಾಶ್ರಿತರಿಗಾಗಿ ಈ ಕೇಂದ್ರವು ತನ್ನ ಬಾಗಿಲು ತೆರೆದಿದೆ ಎಂದು ಹೇಳಿದರು. 

"ಈ ಕಟ್ಟಡವು ಭೂಕಂಪದ ನಂತರದ ಪುನರ್‌ ನಿರ್ಮಾಣದ ಭಾಗವಾಗಿದ್ದು, ಭಾರತೀಯ ರಾಯಭಾರ ಕಚೇರಿಯು ಇದಕ್ಕೆ ಆರ್ಥಿಕ ನೆರವು ನೀಡಿದೆ. ಈ ಕಟ್ಟಡವು ಜನರಿಗೆ ಪ್ರಮುಖ ಆಧಾರವಾಗಿದೆ. ಪ್ರವಾಹ ಪೀಡಿತ ಪ್ರದೇಶಗಳಿಂದ ರಕ್ಷಿಸಲ್ಪಟ್ಟ ಅನೇಕ ಜನರನ್ನು ಇಲ್ಲಿಗೆ ಕರೆತಂದು ಚಿಕಿತ್ಸೆ ನೀಡಲಾಗಿದೆ ಮತ್ತು ಅವರ ಆರೋಗ್ಯ ಈಗ ಸ್ಥಿರವಾಗಿದೆ ಎಂದು ಗಿರಿ ಹೇಳಿದರು.

ಪ್ರತಿದಿನ ರಾತ್ರಿ 100ಕ್ಕೂ ಹೆಚ್ಚು ನಿರಾಶ್ರಿತರು ಈ ಕೇಂದ್ರದಲ್ಲಿ ಉಳಿದುಕೊಳ್ಳುತ್ತಿದ್ದಾರೆ ಮತ್ತು ಹತ್ತಿರದ ತಾತ್ಕಾಲಿಕ ಆಶ್ರಯ ಕೇಂದ್ರಗಳಲ್ಲಿರುವ ಜನರಿಗೂ ವೈದ್ಯಕೀಯ ನೆರವು ನೀಡಲಾಗುತ್ತಿದೆ ಎಂದು ಅವರು ತಿಳಿಸಿದರು.