ಸಿಡ್ನಿ: ಸೀಮಿತ ಓವರ್ ಗಳ ಪಂದ್ಯದ ಮೂಲಕ ಭರ್ಜರಿ ಫಾರ್ಮ್ ಪ್ರದರ್ಶಿಸಿದ ಕೆಎಲ್ ರಾಹುಲ್, ವಿರಾಟ್ ಕೊಹ್ಲಿ ಅನುಪಸ್ಥಿತಿಯಲ್ಲಿ ಟೆಸ್ಟ್ ತಂಡದಲ್ಲೂ ಸ್ಥಾನ ಕಂಡುಕೊಳ್ಳುವ ಕನಸು ಕಂಡಿದ್ದರು. ಆದರೆ ಅದೀಗ ಕನಸಾಗಿಯೇ ಉಳಿಯಿತು.
ಆಸ್ಟ್ರೇಲಿಯಾ ನೆಲದಲ್ಲಿ ಟೆಸ್ಟ್ ಆಡುವುದು ಕ್ರಿಕೆಟಿಗರ ಕನಸು. ರಾಹುಲ್ ಕೂಡಾ ಮತ್ತೆ ಟೀಂ ಇಂಡಿಯಾ ಟೆಸ್ಟ್ ತಂಡದಲ್ಲಿ ಸ್ಥಾನ ಪಡೆಯಲು ಆಸ್ಟ್ರೇಲಿಯಾ ಸರಣಿಯನ್ನು ಗುರಿಯಾಗಿಸಿದ್ದರು. ದುರಾದೃಷ್ಟವೆಂದರೆ ಅವರಿಗೆ ಮೊದಲ ಎರಡು ಟೆಸ್ಟ್ ಪಂದ್ಯಗಳಲ್ಲಿ ಸ್ಥಾನ ಸಿಕ್ಕಿರಲಿಲ್ಲ. ಮೂರನೇ ಟೆಸ್ಟ್ ನಲ್ಲಿ ಇನ್ನೇನು ಸ್ಥಾನ ಸಿಗುತ್ತದೆ ಎಂದಾಗುವಾಗ ಗಾಯ ಎಲ್ಲವನ್ನೂ ನುಚ್ಚನೂರು ಮಾಡಿದೆ. ಮುಂದೆ ಭಾರತ ಇಂಗ್ಲೆಂಡ್ ವಿರುದ್ಧ ತವರಿನಲ್ಲಿ ಟೆಸ್ಟ್ ಸರಣಿ ಆಡಲಿದೆ. ಆ ಸರಣಿಯಲ್ಲಿ ಅವರಿಗೆ ಅವಕಾಶ ಸಿಗುವುದು ಸಂಶಯವೇ. ಹೀಗಾಗಿ ಅವರು ಟೆಸ್ಟ್ ತಂಡಕ್ಕೆ ಪುನರಾಗಮನಗೈಯಲು ಕೆಲವು ಸಮಯ ಕಾಯಲೇಬೇಕಾಗುತ್ತದೆ.
