ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ ಜೊತೆ ಬಿಸಿಸಿಐ ಮಹತ್ವದ ಸಭೆ ನಡೆಸಲಿದೆ ಎಂದು ಸುದ್ದಿಯಾಗುತ್ತಿದೆ. ಇದಕ್ಕೆ ಫ್ಯಾನ್ಸ್ ಆಕ್ರೋಶ ವ್ಯಕ್ತಪಡಿಸಿದ್ದು ಮೊದಲು ಗೌತಮ್ ಗಂಭೀರ್, ಅಜಿತ್ ಅಗರ್ಕರ್ ಜೊತೆ ಮಾಡಿ ಎಂದಿದ್ದಾರೆ.
ಯಾಕೋ ಆಯ್ಕೆ ಸಮಿತಿಗೆ ಕೊಹ್ಲಿ, ರೋಹಿತ್ ಏಕದಿನ ಮಾದರಿಯಲ್ಲೂ ಮುಂದುವರಿಯುವುದು ಇಷ್ಟವಿಲ್ಲವೇನೋ. ಈ ಕಾರಣಕ್ಕೆ ಉತ್ತಮ ಪ್ರದರ್ಶನ ನೀಡಿದರೂ ಈ ಇಬ್ಬರು ಹಿರಿಯ ಆಟಗಾರರು ಟಾರ್ಗೆಟ್ ಆಗುತ್ತಿದ್ದಾರೆ.
ಇದೀಗ ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಸರಣಿ ಬಳಿಕ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಜೊತೆ ಬಿಸಿಸಿಐ ಅವರ ಭವಿಷ್ಯದ ಬಗ್ಗೆ ಚರ್ಚೆ ನಡೆಸಲಿದೆ ಎಂದು ಸುದ್ದಿಯಾಗಿದೆ. ಇದು ಅಭಿಮಾನಿಗಳ ಆಕ್ರೋಶಕ್ಕೆ ಕಾರಣವಾಗಿದೆ.
ಈಗಾಗಲೇ ಟೆಸ್ಟ್ ಮತ್ತು ಟಿ20 ಕ್ರಿಕೆಟ್ ನಿಂದ ಇಬ್ಬರೂ ನಿವೃತ್ತಿಯಾಗಿದ್ದಾರೆ. ಹಾಗಿದ್ದರೂ ಯುವ ತಂಡ ಏನೂ ಕಿಸಿಯುತ್ತಿಲ್ಲ. ಕೋಚ್ ಗೌತಮ್ ಗಂಭೀರ್ ಮತ್ತು ಆಯ್ಕೆ ಸಮಿತಿ ಮುಖ್ಯಸ್ಥ ಅಜಿತ್ ಅಗರ್ಕರ್ ಪ್ರತಿಷ್ಠೆಗೆ ಭಾರತೀಯ ಕ್ರಿಕೆಟ್ ತಂಡವೇ ಬಲಿಯಾಗಿದೆ.
ಹೀಗಿರುವಾಗ ಜನ ಈಗ ಏಕದಿನ ಪಂದ್ಯ ಮಾತ್ರ ಕೊಹ್ಲಿ-ರೋಹಿತ್ ಗಾಗಿ ನೋಡುತ್ತಿದ್ದಾರೆ. ಅದರಿಂದಲೂ ಈ ಇಬ್ಬರೂ ದಿಗ್ಗಜರನ್ನು ಒತ್ತಡ ಹಾಕಿ ನಿವೃತ್ತಿಯಾಗುವಂತೆ ಮಾಡುವುದು ಎಷ್ಟು ಸರಿ? ಹಾಗೆ ನೋಡಿದರೆ ಅಜಿತ್ ಅಗರ್ಕರ್ ಮತ್ತು ಗಂಭೀರ್ ಜೊತೆ ಬಿಸಿಸಿಐ ಸಭೆ ನಡೆಸಿ ಕ್ಲಾಸ್ ತೆಗೆದುಕೊಳ್ಳಬೇಕು ಎಂದು ಫ್ಯಾನ್ಸ್ ಆಗ್ರಹಿಸುತ್ತಿದ್ದಾರೆ.
